३ माघ,२०८२ काठमाडौं – नेपाली कांग्रेसमा जेनजी आन्दोलनपछि उठेको नेतृत्व परिवर्तनको मागलाई निर्वाचन आयोगले वैधानिक ठहर गर्दै गगन थापालाई सभापतिको मान्यता दिएको छ। ४० प्रतिशतभन्दा बढी महाधिवेशन प्रतिनिधिको हस्ताक्षरसहित माग गरिएको विशेष महाधिवेशन वैधानिक भएको निष्कर्ष आयोगले निकालेको हो।

आयोगको निर्णयपछि देउवा पक्षले आपत्ति जनाउँदै आन्दोलन र कानुनी लडाइँको चेतावनी दिएको छ। कार्यवाहक सभापति पूर्णबहादुर खड्काले निर्णय षड्यन्त्रपूर्ण भएको दाबी गरेका छन् भने गगन–विश्व पक्षले विधान, संविधान र दलसम्बन्धी कानुनअनुसार निर्णय आएको बताएका छन्।

आयोगको निर्णयसँगै कांग्रेसमा पुस्तान्तरणको औपचारिक सुरुआत भएको र यसले राष्ट्रिय राजनीतिमा समेत नयाँ सन्देश दिएको विश्लेषण गरिएको छ।