कात्तिक २५, २०८२ काठमाडौं— अमेरिकास्थित नेपाली राजदूत लोकदर्शन रेग्मीले आफ्नो पदबाट राजीनामा दिएका छन्। स्रोतका अनुसार, रेग्मीले राजीनामा दिएको तीन दिनपछि मात्रै उनको राजीनामा पत्र मङ्गलबार सार्वजनिक गरिएको हो। उनले दिएको राजीनामा कात्तिक २२ गतेदेखि लागू हुने गरी स्वीकृत गरिएको बताइएको छ।

यसअघि, गत असोज २० गते बसेको मन्त्रिपरिषद्को बैठकले भारतबाहेक विभिन्न ११ देशमा कार्यरत नेपाली राजदूतहरूलाई फिर्ता बोलाउने निर्णय गरेको थियो। सो निर्णयपछि रेग्मी पनि फिर्ता बोलाइएका राजदूतहरूको सूचीमा परेका थिए।

तर, सरकारको उक्त निर्णय कार्यान्वयन नगर्न भन्दै सर्वोच्च अदालतले कात्तिक १६ गते अन्तरिम आदेश जारी गरेको थियो। अदालतको आदेशपछि राजदूतहरूको फिर्ता प्रक्रिया रोकिएको थियो।