कात्तिक १८, २०८२ काठमाडौं— चालु आर्थिक वर्षको पुँजीगत खर्च अघिल्लो वर्षको तुलनामा उल्लेख्य रूपमा घटेको छ। अर्थ मन्त्रालय मातहतको महालेखा नियन्त्रक कार्यालयका अनुसार असोज १८ गतेसम्म कुल ४ खर्ब ७ अर्ब रुपैयाँ विनियोजन गरिएको पुँजीगत बजेटमध्ये मात्र २२ अर्ब खर्च भएको छ। गत वर्ष यही अवधिमा ३२ अर्ब ५६ करोड खर्च भएको थियो।

पुँजीगत खर्चमा गिरावटले विकासको गति सुस्त भएको देखिन्छ। जेनजी आन्दोलनपछि बढ्दो अनिश्चितता र निर्माण व्यवसायीहरूको निष्क्रियताले पनि खर्च घट्नमा असर गरेको बताइन्छ।

यता चालु खर्च भने बढेको छ। महालेखा नियन्त्रक कार्यालयका अनुसार असोज १८ सम्म २ खर्ब ८२ अर्ब रुपैयाँ खर्च भइसकेको छ, जुन अघिल्लो वर्षको यही अवधिमा २ खर्ब ६४ अर्ब थियो। चालु खर्चमा मुख्यतः कर्मचारी तलब–भत्ता, प्रशासनिक र सञ्चालन खर्च समावेश छन्।