भदौ ४,२०८२ काठमाडौं – जोशी हाइड्रोपावर डेभलपमेन्ट कम्पनी ले निष्कासन गरेको हकप्रद सेयरमा आवेदन दिने समय थपिएको छ। कम्पनीले साउन १५ गतेदेखि हकप्रद सेयर निष्कासनमा ल्याएको थियो। तोकिएको अवधिभित्र मागअनुसार आवेदन नपरेपछि अब भदौ १९ गतेसम्म आवेदन दिन सकिने भएको हो।

कम्पनीले हाल कायम १ कित्ता सेयर बराबर ०.६५ कित्ता अनुपातमा चुक्ता पूँजीको ६५ प्रतिशत हकप्रद सेयर निष्कासन गर्दैछ। यसअनुसार कम्पनीले २४ लाख १४ हजार १०० कित्ता सेयर निष्कासन गर्दै २४ करोड १४ लाख १० हजार रुपैयाँ बराबरको पूँजी जुटाउने लक्ष्य राखेको छ।

यस प्रयोजनका लागि कम्पनीले असार ८ गते बुकक्लोज गरेको थियो। असार ५ गतेसम्म कायम रहेका सेयरधनीले आवेदन दिन सक्नेछन्। सेयर निष्कासन तथा बिक्री प्रबन्धक लक्ष्मी सनराइज क्यापिटल लिमिटेड रहेको छ। लगानीकर्ताले बिक्री प्रबन्धक, कम्पनीको कार्यालय तथा लक्ष्मी सनराइज बैंकको इलाम शाखा कार्यालयबाट प्रत्यक्ष आवेदन दिन सक्नेछन्। साथै, नेपाल धितोपत्र बोर्डमा सूचीकृत सी-आस्बा सदस्य बैंक तथा वित्तीय संस्था र मेरो सेयर मार्फत पनि आवेदन दिन सकिनेछ।