१२ चैत २०७८, काठमाडौं : इतिहासमा २६ मार्चका दिन भएका केही महत्त्वपूर्ण घटनाहरु भएका छन् । आज रुसका राष्ट्रपतिमा पुटिन निर्बाचित भएको दिनको रुपमा सम्झिन सकिन्छ । त्यस्तै, यो दिन दुई राष्ट्रबीचको ३० वर्ष लामो यद्धबिराम भएको दिन पनि हो ।

रुसमा पुटिन राष्ट्रपति

सन् २००० मा भ्लादिमिर पुटिन रुसको राष्ट्रपतिमा निर्वाचित भए। भूतपूर्व केजीबी अधिकारी पुटिनले रुसलाई १९९० को आर्थिक संकटबाट मुक्त गरेकोमा सुरुवाती समयमा उनको प्रशंसा गरिएको थियो । रुसमा लामो समयदेखि एकछत्र शासन कायम गरेका पुटिनको पछिल्लो समयमा युक्रेनमाथि हमला गर्ने निर्णयका कारण अन्तर्राष्ट्रिय समुदायले चर्को आलोचना गरिरहेको छ । रुसले २४ फेब्रुअरी २०२२ देखि युक्रेनमाथि हमला गरिरहेको छ ।

मर्कोसर समूह स्थापना

सन् १९९१ मा चार ओटा दक्षिण अमेरिकी देशहरुले मर्कोसर समूह स्थापना गरेका थिए । अर्जेन्टिना, ब्राजिल, उरुग्वे र पारग्वे समूहका संस्थापक सदस्य हुन् । साझा बजार प्रवर्द्धन गर्ने उद्देश्यले समूह स्थापना गरिएको हो ।

इजरायल र इजिप्टबीच ऐतिहासिक सन्धि

सन् १९७९ मा इजरायल र इजिप्टबीच ऐतिहासिक शान्ति सम्झौतामा हस्ताक्षर भएको थियो । इजिप्टका राष्ट्रपति अजवर अल सदात र इजरायलका प्रधानमन्त्री मेनाचेम बिगिनले सो सन्धिमा हस्ताक्षर गरेका थिए । सम्झौतासँगै दुई देशबीचको ३० वर्ष लामो युद्ध समाप्त भयो ।

जैविक हतियार सन्धि

सन् १९७५ मा जैविक हतियार सन्धि कार्यान्वयनमा आएका थियो । सन्धिले जैविक र विषाक्त हतियारको विकास, उत्पादन र भण्डारणमा प्रतिबन्ध लगाएको छ । यसलाई अहिले विश्वका अधिकांश देशहरूले अनुमोदन गरिसकेका छन् ।