२५ बैशाख २०८३ काठमाडौं- वाणिज्य, आपूर्ति तथा उपभोक्ता संरक्षण विभागले बजार अनुगमनका क्रममा नियम उल्लङ्घन गर्ने तीन वटा व्यावसायिक फर्मलाई कारबाही गरेको छ। विभागले बिहीबार काठमाडौँ उपत्यकामा गरिएको अनुगमनका क्रममा उपभोक्ता हितविपरीत कार्य गरेको पाइएपछि नगद जरिवानासहित कारबाही गरिएको जनाएको हो।

कारबाहीमा काठमाडौँ महानगरपालिका–२६ गोङ्गबुस्थित लुगा जुत्ता प्रालिलाई ५० हजार रुपैयाँ, पूजा शृङ्गारलाई १० हजार रुपैयाँ तथा नयाँ बानेश्वरस्थित श्रेष्ठ कस्मेटिक्स शपलाई १५ हजार रुपैयाँ जरिवाना गरिएको विभागले जनाएको छ। ती फर्मबाट कुल ७५ हजार रुपैयाँ जरिवाना असुल गरिएको हो।

विभागका अनुसार ती व्यवसायीहरूले उपभोक्ता संरक्षण ऐन २०७५ तथा उपभोक्ता संरक्षण नियमावली २०७६ विपरीतका गतिविधि गरेको, विभागीय निर्देशन पालना नगरेको तथा अनुचित व्यापारिक अभ्यास अपनाएको पाइएपछि कारबाही गरिएको हो।

अनुगमनका क्रममा मूल्यसूची नराख्ने, उपभोक्तालाई आवश्यक जानकारी नदिने तथा व्यापारिक मापदण्डविपरीत गतिविधि सञ्चालन गरेको जस्ता कमजोरी भेटिएको विभागले जनाएको छ। यसैबीच, विभागले अन्य १० वटा उद्योग तथा व्यावसायिक फर्मलाई भने तत्काल सुधार गर्न निर्देशन दिएको छ।