१० बैशाख २०८३ काठमाडौं – राजधानी काठमाडौं उपत्यकाको वायु प्रदूषण खतरनाक स्तर नजिक पुगेको छ । स्विट्जरल्याण्डको रियल–टाइम वायु मापन संस्था IQAir का अनुसार आज बिहान वायु गुणस्तर सूचकांक (AQI) २४७ सम्म पुगेको थियो भने समाचार तयार पार्दासम्म २१६ मा झरेको छ ।

AQI २०१ देखि ३०० लाई ‘निकै अस्वस्थ’ मानिन्छ । यस अवस्थामा सर्वसाधारणमा समेत स्वास्थ्य जोखिम बढ्ने र संवेदनशील समूहका लागि अझ गम्भीर असर पर्ने बताइएको छ ।

हाल नेपाल विश्वकै प्रदूषित देशहरूको सूचीमा दोस्रो स्थानमा रहेको छ भने पहिलो स्थानमा पाकिस्तान रहेको जनाइएको छ । काठमाडौं उपत्यकामा बाक्लो तुवाँलो (smog) देखिएको छ ।

सरकारी मापदण्ड अनुसार AQI ०–५० राम्रो, ५१–१०० मध्यम, १०१–१५० संवेदनशील समूहका लागि अस्वस्थ, १५१–२०० अस्वस्थ, २०१–३०० निकै अस्वस्थ र ३०१ भन्दा माथि खतरनाक स्तर मानिन्छ ।