श्रावण ४ ,२०८२ काठमाडौं ।  हाल देशभर मनसुनी वायुको प्रभाव सक्रिय रहँदा विभिन्न भागमा लगातार वर्षा भइरहेको छ। विशेष गरी गण्डकी प्रदेशका धेरै ठाउँमा भारी वर्षा भइरहेको छ भने अन्य क्षेत्रहरूमा पनि व्यापक असर देखिएको छ।

जल तथा मौसम विज्ञान विभागका अनुसार मनसुनको न्यूनचापीय रेखा सरदर स्थानभन्दा अलिक उत्तरतिर सरेको छ। यसका कारण कोशी, मधेस, बागमती, गण्डकी, र कर्णाली प्रदेशका पहाडी भागहरूमा मेघगर्जन र चट्याङसहित हल्कादेखि मध्यम वर्षासम्मको सम्भावना रहेको छ। कतिपय ठाउँमा भने भारीदेखि अति भारी वर्षाको पूर्वानुमान गरिएको छ।

यस्तै, देशका उच्च पहाडी तथा हिमाली भूभागमा हल्कादेखि मध्यम वर्षा र हिमपातको सम्भावना समेत रहेको विभागले जनाएको छ। विभागका अनुसार आज राति देशभर सामान्यतया बदली रहनेछ भने गण्डकी, लुम्बिनी, कर्णाली, र सुदूरपश्चिम प्रदेशका धेरै स्थान तथा अन्य प्रदेशका केही ठाउँमा मेघगर्जनसहित वर्षा हुने संकेत देखिएको छ।

बढ्दो वर्षाले बाढी र पहिरोको जोखिम बढेको भन्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणले उच्च सतर्कता अपनाउन आग्रह गरेको छ। स्थानीय प्रशासन र नागरिकलाई आवश्यक सतर्कता र सावधानी अपनाउन अपिल गरिएको छ।

प्राधिकरणले विशेष गरी पहाडी भेगका बासिन्दाहरूलाई सतर्क रहन, खोलानाला आसपास सतर्कता अपनाउन तथा आवश्यक परे सुरक्षित स्थानतर्फ सर्न आग्रह गरेको छ।