• 8:37 pm

जुम्लाको गुठिचौरमा रक्सी पिउन लाइसेन्स अनिवार्य

प्रकाशित मिति

२०८० श्रावण १६ गते, मंगलवार ०४:३५

१६ श्रावण २०८०, काठमाडौँ: जुम्लाको गुठिचौर गाउँपालिकाले मदिरा सेवन गर्नेहरूले अनिवार्य ‘रक्सी सेवन कार्ड’ लिनुपर्ने नियम बनाएको छ । गाउँपालिकाले भदौ १ गतेबाट लागु हुने गरी मदिरा (रक्सी) नियन्त्रण कार्यविधि, २०८० ल्याएको हो । कार्यविधि असार ३१ गतेको गाउँसभाले सर्वसम्मत पारित गरेको थियो ।


अब मदिरा सेवन गर्न चाहनेहरूले भदौ १ अगाडि नै ‘रक्सी सेवन कार्ड’ लिनुपर्ने छ । अन्यत्रबाट आएका मदिरा सेवन गर्न चाहने पाहुनाले ‘अतिथि रक्सी सेवन कार्ड’ लिनुपर्ने छ । रक्सी सेवनकर्ताले दैनिक १८० मिलि र बियर भएमा एक बोतलमा मात्र सेवन गर्न पाउने छन् । त्यतिमात्र होइन उनीहरूले रक्सी पिएबापत गाउँपालिकालाई वार्षिकरूपमा ५०० रुपैयाँ शुल्क तिर्नुपर्ने छ । कार्डका लागि थप ५०० रुपैयाँ तिर्नुपर्ने छ ।


अतिथि कार्डबापत प्रत्येक दिन १०० रुपैयाँका दरले शुल्क लाग्ने छ । मदिरा बिक्री गर्ने समय पनि छुट्याइएको छ । होलसेल विक्रेताले बिहान ७ बजेदेखि अपराह्न ५ बजेसम्म मात्र मदिरा बिक्री गर्न पाउने छन् । फुटकर विक्रेताले बेलुकी ६ बजेदेखि राति ९ बजेसम्म मात्रै मदिरा बिक्री वितरण गर्न पाउने छन् ।


मदिरा सेवन गरी समुदायमा होहल्ला, शान्ति भंग हुने क्रियाकलाप गरेमा पहिलोपटक एकहजार रुपैयाँ जरिबाना गरिने छ । त्यसपछि दुई हजारका दरले जरिबाना बढ्दै जाने छ ।


त्यसैगरी मदिरा बिक्री वितरणकर्ता, ओसारपसारकर्ता र उत्पादनकर्ताले कार्यविधिको उल्लंघन गरेमा पहिलोपटक १० हजार जरिबाना गरिने छ । त्यसपछि २० हजारका दरले वृद्धि गरिने छ ।

प्रतिकृया