१ असोज २०७९, काठमाडौं : फिल्म रिलिज हुन सात दिन बाँकी रहँदै नेपाली मल्टिप्लेक्स हलहरुले ‘प्रेमगीत ३’को अग्रिम बुकिङ खुला गरेका छन् । क्यूएफएक्स बाहेकका हलहरु एफक्यूब, आईएनआई, सिने द सेफ लगायतले अग्रिम बुकिङ खुलाएका हुन् । क्यूएफएक्स र बिग मुभिजले केही दिनमै नेपाली संस्करणको बुकिङ खुलाउने जनाएका छन् ।

असोज ७ गते नेपालमा ‘प्रेमगीत ३’को नेपाली र हिन्दी संस्करण एकैसाथ प्रदर्शन हुने तयारीमा छन् । यसअघि तेलुगू फिल्म ‘केजीएफ २’को अग्रिम बुकिङ पनि एकसाता रिलिज बाँकी रहँदै खुलाइएको थियो । एफक्यूबले ६ शो तथा आईएनआई ल्होत्से र बुटवलस्थित हलमा गरी ६ शो दिएको छ । सिने द सेफले पनि ६ शो दिएको छ । ‘कबड्डी ४’पछि सुस्ताएको नेपाली फिल्म बजारलाई ‘प्रेमगीत ३’ ले चलायमान बनाउने अपेक्षा हल सञ्चालकले गरेका छन् । निर्माता सन्तोष सेनले बुकिङ खुलाएसँगै अब आफूहरु रिलिजको तयारीमा जुटेको बताए ।

आईएनआईका प्रबन्ध निर्देशक सुरेन्द्र थापाले पनि ‘प्रेमगीत ३’ को बुकिङलाई लिएर दर्शकले सोधखोज गरिरहेको जनाए । सन्तोष सेन र छेतेन गुरुङ निर्देशित ‘प्रेमगीत ३’ मा प्रदीप खड्का र क्रिस्टिना गुरुङको प्रमुख भूमिका छ ।