११ चैत्र २०७८, काठमाडौँ : साउदी अरेबियामा कामदारको स्वास्थ्य बिमा नगर्ने कम्पनीले प्रति व्यक्ति २० हजार साउदी रियालसम्म तिर्नुपर्ने भएको छ ।

मानव संसाधन र सामाजिक विकास मन्त्रालयले निजी क्षेत्रका कम्पनीहरूमा काम गर्ने आफ्ना सबै कामदार (साउदी नागरिक र आप्रवासी कामदार) र उनीहरूका आश्रितहरूका लागि रोजगारदाता कम्पनीले स्वास्थ्य बिमा उपलब्ध गराउन आवश्यक रहेको जनाएको छ।

कार्यरत कामदारको स्वास्थ्य बिमा नगराउने रोजगारदाता कम्पनीहरूले प्रति व्यक्ति २० हजार रियालसम्म जरिवाना तिर्नुपर्ने मन्त्रालयले जनाएको छ ।

५१ वा सोभन्दा बढी कामदार भएका कम्पनीले ‘क’ श्रेणीमा प्रत्येक कामदारलाई अधिकतम २० हजार, ११ देखि ५० जनासम्म कामदार भएका कम्पनीले‘बी’ श्रेणीमा प्रत्येक कामदारलाई ५ हजार र १० वा सोभन्दा कम कामदार भएका कम्पनीले ‘सी’ श्रेणीमा प्रत्येक कामदारलाई २ हजार रियाल जरिवाना हुने मन्त्रालयले जनाएको छ ।

स्वास्थ्य बिमा नगर्ने कामदारको समस्या पत्ता लगाउन स्वास्थ्य बिमा परिषद्सँग एकीकृत सम्पर्क गर्ने काम भइरहेको मन्त्रालयले जनाएको छ।निजी क्षेत्रका कामदारहरूको स्वास्थ्य बिमा नगराए रोजगारदाताले कानुन उल्लङ्घन गरेको मानिने र जरिवाना गरिने उल्लेख छ ।

मन्त्रालयले आफ्नो क्षेत्र र कार्यालय अनुगमन मार्फत उल्लङ्घनहरूको अनुगमन गरिरहेको, श्रम कानुन उल्लङ्घन सम्बन्धी प्रतिवेदन र गुनासोहरू सम्बोधन गर्न मन्त्रालयको कल सेन्टर वा टुगेदर फर मोनिटरिङ एप्लिकेसन मार्फत प्राप्त रिपोर्टहरू तुरुन्तै सम्बोधन गर्ने जनाएको छ।

स्वास्थ्य बिमा परिषद्सँग समन्वय गरी सबै कम्पनी तथा प्रतिष्ठानले आफ्ना कामदारको स्वास्थ्य बिमाको नियम पालना गरेको सुनिश्चित गर्न निरन्तर अभियान सञ्चालन गरिरहेको जनाएको छ ।

भर्खरै, स्वास्थ्य बिमा परिषद्ले एकीकृत राष्ट्रिय स्वास्थ्य प्लेटफर्म नफिसमा लिङ्क गर्ने प्रक्रियालाई सहज बनाएर सरोकारवालाहरूलाई सशक्त बनाउन ‘सफ्टवेयर कन्सेक्टथाओन’ नामक कार्यक्रम आयोजना गरेको साउदी मन्त्रालयलाई उद्धृत गर्दै ग्याजेटले जनाएको छ।

कार्यक्रमको उद्देश्य स्वास्थ्य बिमा क्षेत्रमा सेवा र कारोबारको गुणस्तर र दक्षता अभिवृद्धि गर्नु र बिमा सरोकारवालाहरूले सामना गर्ने समस्याहरूको समाधान खोज्नमा योगदान पुर्‍याउनु रहेको छ । साउदी अरेबियामा विभिन्न क्षेत्रमा गरी करिब चार लाख नेपाली कामदार कार्यरत रहेको पाइन्छ ।