काठमाडौं । आजदेखि सुन्दर यातायातले काठमाडौँ उपत्यकामा आफ्ना सवारीसाधन सञ्चालन गर्ने भएको छ ।

नेपालमा पहिलो पटक विद्युतीय बस सञ्चालन गरेको प्रालिले सरकारले थप ५० प्रतिशत भाडा लिन पाउने निर्णय गरे पनि सुन्दर यातायातले पुरानै भाडामा सेवा दिन लागेको जनाएको छ ।

यात्रुको स्वास्थ्यलाई ध्यानमा राखी स्यानिटाइजर, मास्क उपलब्ध गराउने र एक पटक परिक्रमा गरेपछि डिसइन्फेक्सन गरिने समेत प्रालिले जनाएको छ।

चालक र सहचालकलाई पञ्जा, स्यानिटाइजर, पीपीई, बुट र मास्कको व्यवस्था गरी बस सेवा सञ्चालन गर्ने पनि योजना छ।

मयूर, उपत्यका यातायात लगायतका केही कम्पनीले भने सोमबारदेखि नै बस सञ्चालन थालिसकेका छन्।

गत बुधबार बसेको मन्त्रिपरिषद्को बैठकले बिहीबारदेखि काठमाडौँ उपत्यकामा र अरू जिल्लामा जिल्लाभित्र सार्वजनिक सवारीसाधन सञ्चालनको निर्णय गरेको थियो।