काठमडौं, प्रहरी प्रधान कार्यालयले सार्वजनिक बिदाको दिन ५ जना प्रहरी नायव उपरीक्षक (डीएसपी) को काज सरूवा गरेको छ । प्रहरी प्रधान कार्यालयले होलीको दिन डीएसपीको काज सरूवा गरेको हो ।

सरूवा हुने डीएसपीहरूमा जिल्ला प्रहरी कार्यालय रौतहटमा कार्यरत डीएसपी नवीन कार्कीलाई महानगरीय प्रहरी वृत्त बौद्धमा काज सरूवा गरिएको छ ।

वृत्त बौद्धका प्रमुख रमेशबहादुर सिंहलाई प्रहरी प्रधान कार्यालयको अपराध अनुसन्धान विभागमा लगिएको छ । त्यसरी नै डीएसपी मदन कुँवरलाई सर्लाही, भरत श्रेष्ठलाई रौतहट र प्रतीकसिंह राठौरलाई सर्लाहीबाट हेडक्वार्टर काज सरूवा गरिएको छ ।

रौतहटका डीएसपी कार्कीमाथि तात्कालिक प्रहरी प्रमुख प्रहरी महानिरीक्षक (आईजीपी) सर्वेन्द्र खनाललाई रौतहट बम विस्फोटन घटनाका अभियुक्त मोहमद अफ्ताब आलमलाई पक्राउ गर्न खोज्दा गलत रिपोर्टिङ गरेको आरोप लागेको थियो ।

त्यतिबेला रौटहट प्रहरी प्रमुखमा एसपी भूपेन्द्र खत्री थिए । खत्री हालका आईजीपी ठाकुरप्रसाद ज्ञवालीको सचिवालयमा छन् । उनकै योजनामा नवीन कार्कीलाई बौद्ध वृत्तमा ल्याएको प्रहरी अधिकारीको भनाइ छ । हाल आलम पुर्पक्षका लागि जेल चलान भएका छन् । उनी नेपाली कांग्रेसका सांसदसमेत हुन् ।