१७ साउन २०८३ काठमाडौं – झापाको काँकडभिट्टा नाकाबाट गत आर्थिक वर्ष २०८२/८३ मा २४ अर्ब ५० करोड ६७ लाख ४४ हजार रुपैयाँ बराबरको पेट्रोलियम पदार्थ आयात भएको छ। काँकडभिट्टा भन्सार कार्यालयका अनुसार उक्त अवधिमा पेट्रोल, डिजेल र लिक्विफाइड पेट्रोलियम ग्यास (एलपीजी) गरी तीन प्रकारका पेट्रोलियम पदार्थ आयात गरिएको हो।

कुल आयातमध्ये पेट्रोल १२ अर्ब १८ करोड ७ लाख ६४ हजार रुपैयाँ, डिजेल ९ अर्ब ५५ करोड ४९ लाख ७ हजार रुपैयाँ र एलपीजी २ अर्ब ७७ करोड १० लाख ७३ हजार रुपैयाँ बराबरको आयात भएको कार्यालयले जनाएको छ।यसअघिको आर्थिक वर्ष २०८१/८२ मा भने पेट्रोल ८ अर्ब ९२ करोड ८५ लाख २६ हजार रुपैयाँ र डिजेल ७ अर्ब ३ करोड ३२ लाख १९ हजार रुपैयाँ बराबरको आयात भएको थियो। यसले पछिल्लो आर्थिक वर्षमा पेट्रोल र डिजेल दुवैको आयात उल्लेख्य रूपमा बढेको देखिएको छ।

भन्सार कार्यालयका प्रमुख शिवलाल न्यौपानेका अनुसार पेट्रोलियम पदार्थको आयातबाट सरकारले पेट्रोलमा ५ अर्ब ८५ करोड ३७ लाख ५० हजार रुपैयाँ र डिजेलमा २ अर्ब ९३ करोड २२ लाख ३९ हजार रुपैयाँ राजस्व संकलन गरेको छ।

पेट्रोलियम पदार्थको बढ्दो आयातसँगै काँकडभिट्टा नाका सरकारको राजस्व संकलनको प्रमुख स्रोतका रूपमा थप महत्त्वपूर्ण बन्दै गएको छ।