श्रावण २६,२०८२ काठमाडौँ — पुँजी बजार सोमबार राताम्य भएको छ। गत बिहीबारको उछालपछि फेरि ओरालो लाग्दै बजार लगातार खुम्चिँदै गएको हो। नेपाल स्टक एक्सचेञ्ज (नेप्से) सूचक आज २९.८६ अंकले घटेर २८२०.५० बिन्दुमा कायम भएको छ। ३२४ कम्पनीका २ करोड ५० लाख १९ हजार कित्ता शेयर कारोबार हुँदै १० अर्ब १८ करोड १४ लाख रुपैयाँको लेनदेन भएको छ।

बजारमा सर्वाधिक गिरावट विकास बैंक र माइक्रोफाइनान्स समूहमा देखियो। विकास बैंक समूह २.४३ प्रतिशत, माइक्रोफाइनान्स २.३३ प्रतिशत, फाइनान्स १.३१ प्रतिशत र होटल तथा पर्यटन समूह १.०६ प्रतिशतले घटे।

सकारात्मक रिपोर्ट सार्वजनिक भए पनि विकास बैंक र लघुवित्तको मूल्य बढ्न सकेन। केही साताअघि ३,००० बिन्दु पार गरेको बजार ३,२०० बिन्दुमा पुग्ने अपेक्षामा हौसिएका लगानीकर्ताहरू अहिले घाटामा छन्, जसले बजारमा आक्रोश बढाएको छ।