२० साउन २०८३ काठमाडौं – एभरेष्ट बैंक लिमिटेडले आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण सार्वजनिक गर्दै खुद नाफा, वितरणयोग्य मुनाफा तथा सञ्चालन आम्दानीमा सुधार भएको जनाएको छ। समीक्षा अवधिमा बैंकले ५ अर्ब ७ करोड रुपैयाँ खुद नाफा कमाएको छ, जुन अघिल्लो आर्थिक वर्षको सोही अवधिको ४ अर्ब ८४ करोड रुपैयाँको तुलनामा ४.७५ प्रतिशत बढी हो।

बैंकको खुद ब्याज आम्दानी सामान्य वृद्धि हुँदै ९ अर्ब १९ करोड ४ लाख रुपैयाँ पुगेको छ। यस्तै, खुद फी तथा कमिशन आम्दानी १ अर्ब ५३ करोड ५ लाख रुपैयाँबाट बढेर १ अर्ब ९४ करोड ७२ लाख रुपैयाँ पुगेको छ। यससँगै कुल सञ्चालन आम्दानी ६.२१ प्रतिशतले बढेर ११ अर्ब ८६ करोड ४६ लाख रुपैयाँ पुगेको छ।

बैंकको सञ्चालन मुनाफा ७ अर्ब ३८ करोड ४४ लाख रुपैयाँ रहेको छ, जुन अघिल्लो वर्षकै हाराहारीमा रहेको छ। यद्यपि, वितरणयोग्य मुनाफा १२.९८ प्रतिशतले बढेर ४ अर्ब ५८ करोड १० लाख रुपैयाँ पुगेको छ। समीक्षा अवधिमा बैंकको प्रतिशेयर आम्दानी (EPS) भने ३७.३९ रुपैयाँबाट घटेर ३६.९५ रुपैयाँमा झरेको छ। त्यस्तै, खराब कर्जा (NPL) ०.३८ प्रतिशतबाट बढेर ०.४९ प्रतिशत पुगेको छ। बैंकको आधार दर ५.३६ प्रतिशतबाट घटेर ४.२५ प्रतिशत कायम भएको छ भने प्रतिशेयर नेटवर्थ २५६.४७ रुपैयाँ रहेको छ।

बैंकको चुक्ता पूँजी १३ अर्ब ७२ करोड १३ लाख रुपैयाँ पुगेको छ भने रिजर्भ कोषमा १५ अर्ब ७२ करोड ७८ लाख रुपैयाँ सञ्चित रहेको छ। यस अवधिमा बैंकको कर्जा लगानी २ खर्ब १३ अर्ब ४३ करोड रुपैयाँबाट बढेर २ खर्ब ३५ अर्ब ५६ करोड रुपैयाँ पुगेको छ। साथै, निक्षेप संकलन २ खर्ब ९८ अर्ब ८१ करोड रुपैयाँबाट बढेर ३ खर्ब १६ अर्ब १ करोड रुपैयाँ पुगेको वित्तीय विवरणमा उल्लेख गरिएको छ।