१५ साउन २०८३ काठमाडौं – देशका विभिन्न स्थानमा खाना पकाउने एलपीजी ग्यासको अभाव देखिन थालेपछि उपभोक्ताले ग्यासका लागि लामो समय कुर्नुपर्ने अवस्था सिर्जना भएको छ। बजारमा ग्यास सहज रूपमा उपलब्ध नहुँदा उपभोक्ता ग्यास सप्लायर्स र डिलरसमक्ष लाइन लाग्न बाध्य भएका छन्। कतिपय स्थानमा एक सिलिन्डर ग्यास पाउन उपभोक्ताले हप्तादिनसम्म कुर्नुपरेको गुनासो गरेका छन्।

नेपाल आयल निगमले फागुनको अन्तिम सातादेखि आधा सिलिन्डर ग्यास वितरण गर्दै आएको थियो। असारको अन्तिमदेखि पुनः पूरा (भरी) सिलिन्डर वितरण सुरु गरेपछि उपभोक्ताको माग एकाएक बढेको र त्यसकै प्रभाव बजारमा देखिएको व्यवसायीहरूको भनाइ छ।

यद्यपि नेपाल आयल निगमले भने बजारमा ग्यासको अभाव नरहेको दाबी गर्दै आएको छ। निगमले आपूर्ति नियमित रहेको बताए पनि राजधानीसहित विभिन्न स्थानमा उपभोक्ताले ग्यास नपाएको गुनासो बढिरहेको छ।