३२ असार २०८३ काठमाडौं – यातायात व्यवस्था कार्यालयले पछिल्लो तीन महिनामा ९० हजार सवारीचालक अनुमतिपत्र (लाइसेन्स) वितरण गरेको छ। यस अवधिमा लाइसेन्स वितरणबाट राज्यकोषमा १९ करोड ८२ लाख रुपैयाँ राजस्व संकलन भएको कार्यालयले जनाएको छ।

कार्यालय प्रमुख प्रविण श्रेष्ठका अनुसार तीन महिनामा कुल दुई लाख ३८ हजार लाइसेन्स छापिएकामध्ये ९० हजार सेवाग्राहीलाई वितरण गरिएको हो। हाल कार्यालयबाट दैनिक एक हजारदेखि एक हजार ८०० जनासम्मलाई सवारीचालक अनुमतिपत्र उपलब्ध गराइँदै आएको उनले जानकारी दिए।

कार्यालयले छपाइ र वितरण प्रक्रियालाई थप प्रभावकारी बनाउँदै सेवाग्राहीलाई छिटो सेवा उपलब्ध गराउने प्रयास जारी रहेको जनाएको छ।