२४ चैत,२०८२ काठमाडौं – गृहमन्त्री सुधन गुरुङ काभ्रेको रोशी खोलाको स्थलगत निरीक्षणमा जाने भएका छन् । वर्षायाममा हरेक वर्ष आउने बाढीका कारण स्थानीयवासीले भोग्दै आएका समस्याबारे गुनासो बढेपछि मन्त्री गुरुङले आज उक्त क्षेत्रको प्रत्यक्ष अवलोकन गर्न लागेका हुन् ।

निरीक्षणका क्रममा उनले बाढीबाट प्रभावित क्षेत्रहरूको अवस्था बुझ्नुका साथै उच्च जोखिममा रहेका बस्ती तथा पूर्वाधारको वास्तविक स्थिति अध्ययन गर्ने जनाइएको छ । बर्खा सुरु हुनुअघि नै सम्भावित जोखिम न्यूनीकरणका लागि आवश्यक तयारी, योजना तथा समन्वयका विषयमा सम्बन्धित निकायलाई निर्देशन दिने तयारी पनि गृहमन्त्री गुरुङले गरेका छन् ।

स्थानीय तह, सुरक्षा निकाय तथा सरोकारवाला निकायसँग समन्वय गर्दै बाढी जोखिम कम गर्ने उपायबारे समेत छलफल हुने बताइएको छ ।