भदौ २२,२०८२ काठमाडौं –  नेकपा एमालेबाट निर्वाचित प्रदेश सांसदहरूसँग लिइने लेबीमा एकरूपता नरहेको खुलासा भएको छ । ललितपुरको गोदावरीमा जारी विधान महाधिवेशनमा प्रस्तुत लेखा आयोगको प्रतिवेदनअनुसार हाल सातवटै प्रदेशमा सांसदहरूसँग लिइने लेबी रकम फरक–फरक देखिएको हो ।

कोशी प्रदेशमा मासिक ८ हजार लिइन्छ भने सो मध्ये २ हजार जिल्ला कमिटीलाई छुट्याइने गरेको छ । मधेश प्रदेशमा मासिक १० हजार, बागमतीमा ७ हजार र लुम्बिनी प्रदेशमा पनि ७ हजार लिइने व्यवस्था छ । लुम्बिनीमा लिइएको रकममध्ये ६ हजार प्रदेश संगठनलाई र १ हजार संसदीय दललाई जाने गरेको छ ।

कर्णाली प्रदेशमा सांसदको पारिश्रमिकको १० प्रतिशत लेबी लिइन्छ भने सुदूरपश्चिममा मासिक ८ हजार ५९९ रुपैयाँ तोकिएको छ ।प्रतिवेदनले विभिन्न प्रदेशमा लागू भइसकेका लेबीका दरलाई एकरूपतामा ढाल्न उपयुक्त हुने सुझाव दिएको छ ।