भदौ १९,२०८२ काठमाडौं – अछाममा १७ र १५ वर्षीया दुई किशोरी मृत फेला परेका छन्। तुर्माखाँद गाउँपालिका–६ सल्लेरीस्थित वनमा बिहीबार बिहान एउटै रुखको हाँगामा झुन्डिएको अवस्थामा उनीहरूलाई भेटिएको हो।

उनीहरू १७ गतेदेखि सम्पर्कविहीन रहेका थिए। घटनास्थल उनीहरूको घरबाट करिब ४ सय मिटर टाढा पर्छ। जिल्ला प्रहरी कार्यालय अछामका डीएसपी ओमप्रकाश खनालका अनुसार बिहान करिब ९ बजे स्थानीयले देखेपछि प्रहरीलाई खबर गरेका थिए।

स्थानीय प्रहरी चौकीको टोली घटनास्थलमा पुगेको छ भने जिल्ला प्रहरी कार्यालयबाट थप टोली पुग्ने क्रममा रहेको छ। डीएसपी खनालले घटनाबारे सूक्ष्म अनुसन्धान सुरु गरिएको र विस्तृत विवरण अनुसन्धानपछि मात्र आउने बताए।