भदौ ५,२०८२ काठमाडौं – अर्थ मन्त्रालयका अनुसार आर्थिक वर्ष २०८१/८२ मा सरकारले लिने वैदेशिक अनुदान र ऋण दुवै घटेको देखिएको छ।

सरकारले आर्थिक वर्ष २०८१/८२ मा ५२ अर्ब ३३ करोड रुपैयाँ अनुदान प्राप्त गर्ने लक्ष्य राखेकोमा मात्र २३ अर्ब ५३ करोड (३२.६२%) मात्र प्राप्त भएको छ। अघिल्लो वर्षको तुलनामा अनुदान प्राप्ति २.०४ प्रतिशतले घटेको मन्त्रालयले जनाएको छ।

यस्तै, वैदेशिक ऋणमा पनि कमी देखिएको छ। चालु आवमा २ खर्ब १७ अर्ब रुपैयाँ ऋण लिन सरकारको लक्ष्य रहेकोमा १ खर्ब २५ अर्ब ४० करोड मात्र ऋण प्राप्त भएको छ। यो लक्ष्यको ५७.७८ प्रतिशत हो। अघिल्लो वर्षमा ऋण प्राप्ति ५९.०७ प्रतिशत रहेको थियो।

कुल वैदेशिक सहायता तर्फ २०८१/८२ मा सरकारको लक्ष्य २ खर्ब ६९ अर्ब थियो, तर १ खर्ब ४८ अर्ब मात्र प्राप्त भएको छ। अघिल्लो आवमा प्राप्ति १ खर्ब ४९ अर्ब ६७ करोड थियो। यसबाट वार्षिक लक्ष्यको तुलनामा सहायता ५५.१५ प्रतिशत मात्रै पुगेको देखिन्छ।

अर्थ मन्त्रालयका अनुसार, पछिल्लो वर्षको तुलनामा वैदेशिक सहायता ०.४९ प्रतिशत, अनुदान २.०४ प्रतिशत र ऋण ०.२१ प्रतिशतले क्रमशः घटेको छ।