१८ बैशाख २०७९, काठमाण्डौं : काठमाण्डौं जिल्ला टोखा नगरपालिकाको मेयर उम्मेदवार रजनी थापाले राम्रो कर्म गरेपछि फल आफैं मिल्ने कुरामा विस्वास राखेको बताएकी छिन् । कर्म गर्नुस्, फल आफैं मिल्छ भन्ने मान्यता बोकेर अघि बढेकी थापाले विगतमा आफूले गरेका कामको मूल्यांकन यसपटक हुने विस्वास व्यक्त गरेकी छन् ।

टोखामा हुने हरेक विकास निर्माण र सामाजिक काममा संलग्न रहँदै आएकी थापाले यसपटक भने मेयरमा जित हात पार्ने दाबी गरेकी छन् । रजनी फाउन्डेशनको अध्यक्ष समेत रहेकी थापाले नेपाली कांग्रेसका नेपाल विद्यार्थी संघ, नेपाल महिला संघ जस्ता भातृसंगठनमा बसेर कुशलतापूर्वक काम गर्दै पनि गर्दै आएको बताउँछिन् ।

नगरको विकास र प्रगतिका लागि काम गर्न सक्ने क्षमता रजनीमा रहेको यहाँका नागरिकहरु बताउँछन्। नेपाली कांग्रेसले टोखा नगरपालिकाको मेयरमा रजनी थापालाई उम्मेदवार बनाएपछि नगरभित्र तरंग उत्पन्न भएको छ । यसपटक टोखा नगरपालिका प्रमुखका लागि १४ जनाको उम्मेदवारी परेको छ। जसमध्ये सबैभन्दा धेरै चर्चा रजनी थापाकै छ।

अघिल्लोपटक एमालेले जितेको यस नगरमा अहिले कांग्रेसबाट मेयरमा रजनी थापा र उपमेयरमा मुरारी तामाङ उठेका छन्। राजनीतिलाई विशुद्ध समाजसेवाको रूपमा लिनु पर्ने बताउँदै थापाले भनिन्, यसअघि टोखाबाट जितेकाहरूले गर्न नसकेको काम यसपटक म गरेर देखाउँछु।