काठमाडौं : नेपाल भ्रमणमा रहेका बहराइनका राजकुमार नासिर बिन हमाद अल खलिफासहितको टोलीले आज (शनिबार) लोबुचे हिमालको सफल आरोहण गरेका छन् ।

गत भदौ ३१ गते काठमाडौं आइपुगेका बहराइनको राजकुमारसहितको टोलीले ६ हजार १ सय १९ मिटर अग्लो लोबुचे हिमाल आज बिहान ८ बजेर ५० मिनेटमा आरोहण गरेको आरोहणको व्यवस्थापन गरेको सेभेन समिट ट्रेकले जानकारी दिएको हो ।

हिमाल आरोहण गर्ने भनेर नेपाल आएका बहराइनका राजकुमार खलिफासहितको टोली करिब दुई महिना नेपालमा बस्ने छ ।

यो टोलीमा १५ जना बहराइनी र ३ जना बेलायती नागरिक छन् । टोलीले मनास्लु र लोबुचे हिमाल आरोहणको अनुमति पाएको छ ।

लोबुचे हिमाल आरोहणमा नेपालका शेर्पा आरोही र गाइडहरुले सघाएका थिए । यो सिजनको पहिलो आरोहण हो ।