काठमाडौं । नेपाली कांग्रेसको १५औँ महाधिवेशनको अवसरमा नेपाल विद्यार्थी संघ (नेविसंघ) ले सामाजिक सञ्जाल लक्षित सिर्जनात्मक भिडियो प्रतियोगिता आयोजना गर्ने भएको छ। ‘महाधिवेशन कन्टेन्ट कम्पिटिसन’ नाम दिइएको प्रतियोगितामा कांग्रेसको इतिहास, जारी महाधिवेशन तथा समसामयिक राजनीतिक विषयवस्तुलाई डिजिटल माध्यमबाट प्रस्तुत गर्न सकिने नेविसंघले जनाएको छ।

प्रतियोगितामा उत्कृष्ट १५ जना स्रष्टालाई कुल २ लाख २० हजार रुपैयाँ नगद पुरस्कार प्रदान गरिनेछ। प्रथम हुनेले ५० हजार, दोस्रोले ३० हजार र तेस्रो हुनेले २० हजार रुपैयाँ प्राप्त गर्नेछन्। यस्तै, उत्कृष्ट १२ जनालाई जनही १० हजार रुपैयाँ सान्त्वना पुरस्कार प्रदान गरिनेछ।

प्रतियोगितामा सहभागी हुन इच्छुकले कांग्रेसको इतिहास, महाधिवेशन तथा समसामयिक विषय समेटेर मौलिक तथा सिर्जनात्मक भिडियो तयार गरी फेसबुक, टिकटक, इन्स्टाग्रामलगायत सामाजिक सञ्जालमा पोस्ट गर्नुपर्नेछ। सहभागीले एकल, समूह वा परिवारसँग मिलेर नृत्य, लिप्सिङ्क, अभिनय, कथावाचनलगायतका रचनात्मक शैलीमा भिडियो बनाउन सक्नेछन्।

विजेताको मूल्याङ्कन भिडियोको विषयवस्तुको गुणस्तर, सिर्जनशीलता, प्रस्तुति शैली तथा सामाजिक सञ्जालमा प्राप्त लाइक, कमेन्ट र सेयरका आधारमा गरिनेछ। कृत्रिम रूपमा बुस्ट वा प्रमोट गरिएका भिडियो भने प्रतियोगितामा समावेश नगरिने नेविसंघकी अध्यक्ष करुणा कटुवालले बताइन्।

प्रतियोगितामा सहभागी हुन टिकटक, फेसबुक वा इन्स्टाग्राम रिल्स पोस्ट गर्दा नेपाली कांग्रेसको आधिकारिक सामाजिक सञ्जाल खाता फलो र मेन्सन गरी तोकिएका ह्यासट्याग प्रयोग गर्नुपर्नेछ। महाधिवेशनलाई डिजिटल पुस्ता र युवासँग जोड्दै उत्साहजनक बनाउन प्रतियोगिता उपयोगी हुने अध्यक्ष कटुवालले बताइन्।