१३ माघ,२०८२ म्याग्दी- म्याग्दीका स्वतन्त्र उम्मेदवार महावीर पुनले आगामी फागुन २१ गते हुने प्रतिनिधिसभा सदस्य निर्वाचनका लागि सार्वजनिक रूपमा चुनाव खर्च सहयोग मागेका छन् । सामाजिक सञ्जाल फेसबुकमार्फत पुनले धेरै समर्थक तथा शुभेच्छुकहरूले सहयोग गर्न बैंक खाता र क्यूआर कोड माग गरेपछि चुनाव प्रयोजनका लागि मात्र नयाँ खाता खोलेको जानकारी दिएका छन् ।

“धेरै साथीहरूको अनुरोध आएपछि चुनावका लागि मात्र भनेर यो नयाँ खाता खोलेको हुँ,” पुनले फेसबुकमा लेखेका छन् । उनले उक्त खाताको आम्दानी–खर्च पूर्ण रूपमा पारदर्शी बनाउने प्रतिबद्धता पनि व्यक्त गरेका छन् ।

पुनले राष्ट्रिय वाणिज्य बैंक, टेकु शाखामा खोलेको बैंक खाता र क्यूआर कोड सार्वजनिक गरेका हुन् ।