कात्तिक २७, २०८० काठमाडौँ: राष्ट्रिय स्वतन्त्र पार्टीका सभापति रवि लामिछानेले टिकटक बन्द गर्नु गलत भएको बताएका छन्। सामाजिक सञ्जाललाई बन्द गर्ने नभई नियमन गर्नुपर्ने उनको भनाइ छ । सरकारले टिकटक बन्द गर्ने निर्णय गरेपछि उनले सामाजिक सञ्जालमा लेखेका छन्,’सामाजिक सञ्जाललाई नियमन गर्ने हो, बन्द गर्ने होइन । समस्या कन्टेन्टको हो, प्लेटफर्मको होइन ।’

खराब विषयबस्तुलाई नियन्त्रण गर्न सकिने उनले बताएका छन् । उनले लेखेका छन्, ‘प्राविधिक रुपमा खराबलाई कन्ट्रोल गर्न सकिन्छ । टिकटकमा हालेको भिडियो रिलमा हाल्न मिल्छ, इन्स्टामा हाल्न मिल्छ, फेसबुकमा हाल्न मिल्छ । के सबै प्लेटफर्म बन्द गर्दै जाने हो त ?’

उनले प्रश्न गरेका छन्,’यो निर्णय गर्ने सत्ताधारी दलकै कैयौँ नेता भ्रष्ट होलान्। के अब पार्टी नै बन्द गरिदिने हो त ?’