पाल्पाः लुम्बिनी मेडिकल कलेज प्रभासबाट बच्चा चोरेर फरार रहेकी महिला स्याङ्जाबाट पक्राउ परेकी छन् । शुक्रवार दिउँसो नवजात शिशु चारेर फरार रहेकी उनलाई स्याङ्जा जिल्लाको मिर्मीबाट प्रहरीले नियन्त्रणमा लिएको हो । नवजात शिशु चोरीमा संलग्न स्याङ्जाको गल्याङ नगरपालिकाकी ३६ वर्षीय बिमला पाण्डे रहेकी छन् ।

गल्याङ प्रहरीले बिहान ९ बजे पाण्डेलाई नियन्त्रणमा लिएर पाल्पा प्रहरीलाई जानकारी गराएको र पाल्पाबाट प्रहरी टोली पुगेर बचसहित महिलालाई पाल्पा ल्याउद्यै गरेको जिल्ला प्रहरी कार्यालय पाल्पाका डिएसपी कृष्णराज सापकोटाले जानकारी दिनुभयो । उहाले बच्चाको हातमा अस्पतालले लगाइदिएको ट्यागका आधारमा महिलालाई नियन्त्रणमा लिन सहज भएको समेत जानकारी दिनुभयो । बच्चाको अवस्था समान्य रहेको र पक्राउ परेकी महिला उपर थप अनुसन्धान भइरहेको समेत डिएसपी सापकोटा जानकारी दिनुभयो ।