मंसिर ८, २०८२ काठमाडौं – नेपाल सरकारको मुख्यसचिवमा सुमनराज अर्याल नियुक्त भएका छन्। प्रधानमन्त्री तथा मन्त्रिपरिषद् कार्यालय (ओपिएमसी) मा बसेको मन्त्रिपरिषद् बैठकले उनलाई मुख्यसचिव पदमा नियुक्त गर्ने निर्णय आज गरेको हो।

हालका मुख्यसचिव एकनारायण अर्याल ५८ वर्षे उमेरहद पूरा भएपछि मंसिर ९ गते (भोलि) बाट अनिवार्य अवकाशमा जाने भएका छन्। त्यसअघि नै रिक्त हुने पदका लागि मन्त्रिपरिषद्ले सुमनराज अर्याललाई नयाँ मुख्यसचिवका रूपमा चयन गरेको हो।

एकनारायण अर्याल १३ भदौ २०८१ मा मुख्यसचिव नियुक्त भएका थिए। करिब डेढ वर्षको कार्यकालपछि उनी उमेरहदका कारण अवकाश लिन लागेका हुन्।

नवनियुक्त मुख्यसचिव सुमनराज अर्याल संघीय प्रशासनमा लामो अनुभवका साथ प्राविधिक तथा प्रशासनिक दुवै क्षेत्रमा सक्रिय रहँदै आएका वरिष्ठ प्रशासक मानिन्छन्।