भदौ १९,२०८२ काठमाडौं – नेपाल राष्ट्र बैंकले एकैपटक १०७ कर्मचारीको सरुवा गरेको छ। सहायक निर्देशकदेखि कार्यकारी निर्देशकसम्मका कर्मचारीलाई विभिन्न विभाग, कार्यालय र महाशाखामा सरुवा गरिएको हो।

आन्तरिक लेखापरीक्षण विभागका कार्यकारी निर्देशक नरेश शाक्यलाई लघुवित्त संस्था सुपरिवेक्षण विभागमा सरुवा गरिएको छ भने लघुवित्त सुपरिवेक्षण विभागका कार्यकारी निर्देशक विमलराज खनाललाई वित्त व्यवस्थापन विभागमा ल्याइएको छ।

त्यसैगरी, पोखरा कार्यालयमा कार्यरत निर्देशक दीपकराज लामिछानेलाई आन्तरिक लेखा परीक्षण विभागमा सरुवा गरिएको छ।

सरुवामा ३८ उपनिर्देशक र ६६ सहायक निर्देशकसमेत परेका छन्। एकै पटक ठूलो संख्यामा भएको यस सरुवालाई राष्ट्र बैंकको आन्तरिक संरचना सन्तुलन र कार्यक्षमता अभिवृद्धिका लागि गरिएको भनिएको छ।