असोज २६, २०८२ काठमाडौं– प्रधानमन्त्री सुशीला कार्की र राष्ट्रियसभाका अध्यक्ष नारायणप्रसाद दाहालबीच आइतबार सिंहदरबारस्थित प्रधानमन्त्री कार्यालयमा भेटवार्ता भएको छ। अध्यक्ष दाहालले आगामी फागुन २० गते राष्ट्रियसभाका एक तिहाइ सदस्यहरूको कार्यकाल समाप्त हुने भएकाले ३५ दिनअघि नै निर्वाचन गर्नुपर्ने संवैधानिक व्यवस्थाबारे प्रधानमन्त्रीसँग छलफल गरेका हुन्।

छलफलपछि अध्यक्ष दाहालले राष्ट्रियसभा निर्वाचनका साथै बैठक बोलाउने तयारीबारे पनि प्रधानमन्त्रीसँग परामर्श भएको जानकारी दिए। हालैको जेनजी आन्दोलनका क्रममा भएको आगजनीबाट बानेश्वरस्थित संसद् भवनमा क्षति पुगेकाले नयाँ हलको व्यवस्था भएपछि मात्र राष्ट्रियसभा बैठक बोलाइने उनले बताए।