भदौ १७,२०८२ काठमाडौं – शैक्षिक सुधार अभियन्ता डा. गोविन्द केसीले मंगलबार तीनदिने अनशन तोडेका छन्। धनगढीस्थित गेटा मेडिकल कलेजमा उपचाररत बिरामी प्रीतम चौधरीको हातबाट जुस पिएर उनले दिउँसो २ बजे अनशन तोडेका हुन्।

केसीका सहयोगी अमृत जैशीका अनुसार उनले पहिले नै तीन दिन मात्र अनशन बस्ने बताएका थिए। स्वास्थ्य अवस्था कमजोर हुँदै गएकाले औषधि खानुभन्दा अनशन तोड्ने निर्णय गरेका हुन्।

अनशनका क्रममा डा. केसीले इलाम, उदयपुर र डडेलधुरामा सरकारी मेडिकल कलेज तथा अस्पताल स्थापना गर्नुपर्ने, कैलालीको गेटामा निर्माण सम्पन्न भइसकेको शिक्षण अस्पताल र शैक्षिक कार्यक्रम तत्काल सञ्चालन गर्नुपर्ने, साथै निजी मेडिकल कलेजको सिट वृद्धि फिर्ता लिनुपर्ने माग राखेका थिए।