All News

विराटनगर, प्रदेश नं १ का मुख्यमन्त्री शेरधन राईले स्वास्थ्य सुरक्षामा विशेष ध्यान दिई यातायात सञ्चालन गर्नुपर्ने बताउनु भएको छ ।आगामी असोज ५ गतेबाट सार्वजनिक यातायात सञ्चालन हुने निर्णय भएपछि यातायात क्षेत्रका सरोकारवाला निकायहरुसँग मुख्यमन्त्री राईले आज भर्चुअल छलफलमा उक्त आग्रह गर्नु भएको हो । लामो समयपछि यातायात सञ्चालन हुने भएपछि यसलाई कसरी सुरक्षित र व्यवस्थित गर्ने भन्ने बारेमा मुख्यमन्त्री राईले सरोकारवालाहरुसँग छलफल गर्नुभएको हो ।

छलफलमा मुख्यमन्त्री राईले असोज ५ गते अगाडि व्यवसायीलाई स्वास्थ्य सजगता अपनाउँदै आफ्ना कर्मचारीको विवरण तयार गर्न आग्रह गर्नुभएको छ । उहाँले यातायात व्यवसायीको साझा समस्यालाई सरकारले सम्बोधन गर्दै जाने बताउँदै मास्क, स्यानिटाइजर जस्ता स्वास्थ्य सुरक्षाका साधन प्रयोग गरेर सावधानी अपनाउन आग्रह गर्नुभयो । उहाँले लामो दूरीका यात्रुको विवरण राख्न पर्ने बताउनुभयो । छलफलमा व्यवसायीले सार्वजनिक यातायात सञ्चालन गर्ने सरकारको निर्णयलाई स्वागत गरेका थिए । उनीहरुले स्वास्थ्य सजगता अपनाउँदै यातायातका साधन चलाउने प्रतिवद्धता व्यक्त गरेका छन् । छलफलमा यातायात व्यवसायीका साथै यातायात क्षेत्रका मजदुर सङ्गठनका प्रतिनिधिको सहभागिता थियो ।

१३८ सङ्क्रमित थप

प्रदेश नं। १ मा गएको २४ घण्टामा १३८ सङ्क्रमित थपिएका छन् । सो अवधिमा एक हजार ७७४ जनाको पिसिआर परीक्षण गरेकोमध्ये ५२ महिला र ८६ पुरुषको रिपोर्ट पोजेटिभ आएको सामाजिक विकास मन्त्रालयले जनाएको छ । मोरङमा १०८, सुनसरीमा २२, झापामा दुई, सङ्खुवासभा, पाँचथर, ताप्लेजुङमा एक÷एक र प्रदेश बाहिर तीनजना सङक्रमित थपिएका छन् । मन्त्रालयका अनुसार विराटनगरमा ७० जनामा सङ्क्रमण देखिएकामध्ये २८ महिला र ४२ पुरुष छन् ।

प्रदेशमा कोरोना सङ्क्रमितको सङ्ख्या चार हजार ९६७ पुगेको छ । प्रदेशमा आज ६४ जना सङक्रमित निको भै घर फर्केका छन् । प्रदेशमा हालसम्म दुई हजार १४२ जना सङ्क्रमित निको भएको मन्त्रालयले जनाएको छ । प्रदेशमा हाल सम्म एक लाख १० हजार ७९० जनाको पिसिआर परीक्षण सम्पन्न भएको छ ।
रासस

काठमाडौँ, सिन्धुपाल्चोक लगायतका जिल्लामा पहिराको जोखिम रहेका बस्तीको भौगर्भिक अध्ययन, पहिरो तथा बाढीबाट विस्थापितको पुनःस्थापना र आगामी दिनमा जोखिम न्यूनीकरणका लागि सुझाव दिन समिति गठन भएको छ ।

राष्ट्रिय पुनर्निर्माण प्राधिकरणले भर्चुअल माध्यमबाट आयोजना गरेको छलफलपछि पहिरो पीडितको पुनःस्थापना र स्थानान्तरणको कार्ययोजना बनाउन राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अधिकृत अनिल पोख्रेलको संयोजकत्वमा समिति गठन गरिएको हो । समितिमा पुनर्निर्माण प्राधिकरणका सम्बन्धित सहसचिव, सिञ्चाइ विभागका उपमहानिर्देशक, वन तथा भूसंरक्षण विभागका उपमहानिर्देशक, शहरी विकास तथा भवन निर्माण विभागका उपमहानिर्देशक, जल तथा मौसम विज्ञान विभागका उपमहानिर्देशक, राष्ट्रिय विपद् जोखिम न्यूनीकरण तथा व्यवस्थापन प्राधिकरणका सम्बन्धित सहसचिव, सिन्धुपाल्चोक जिल्ला समन्वय समिति प्रमुख, प्रदेश सरकारको सम्बन्धित मन्त्रालयका प्रतिनिधि एवं सिन्धुपाल्चोक जिल्लाका प्रमुख जिल्ला अधिकारी सदस्य रहनुभएको छ ।

समितिले १५ दिनभित्र जोखिम बस्तीको पहिचान गर्नेछ भने संरक्षण गर्न सकिने बस्तीका लागि संरक्षण सम्बन्धी कार्ययोजना बनाउनेछ । यसैगरी, बस्ती स्थानान्तरण गर्नुपर्ने भए सुरक्षित स्थानसहित त्यसको कार्यतालिका र कार्ययोजना पनि प्रस्ताव गर्नेछ । त्यसका लागि आवश्यक बजेट एवं त्यसको स्रोत, जनशक्ति, विद्यमान कानूनी व्यवस्था र एकीकृत प्राविधिक निर्देशिका पनि तयार गर्नेछ ।

समितिले यसका लागि संविधानमा तोकिएको तहगत सरकारको जिम्मेवारीका आधारमा कार्य विभाजन गर्न पनि सिफारिस गर्नेछ । भदौ पहिलो साता मन्त्रीपरिषद्ले हालैका बाढी तथा पहिरोबाट विस्थापित बस्तीको स्थानान्तरणको काम गृह मन्त्रालयको संयोजनमा शहरी विकास मन्त्रालय र पुनर्निर्माण प्राधिकरणले गर्ने निर्णय गरेकाले त्यसका लागि प्रष्ट कार्ययोजना सम्बन्धमा पनि सुझाव दिनेछ । समितिले तयार गरेको कार्ययोजना विपद् जोखिम न्यूनीकरण तथा व्यवस्थापन प्राधिकरणको कार्यकारी समितिको बैठकमा प्रस्तुत हुनेछ । पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले प्राकृतिक प्रकोपसँग जोडिएका क्षेत्रमा काम गर्ने निकायबीच बृहत समन्वयको आवश्यकता देखिएकोले छलफल आयोजना गरिएको बताउनुभयो ।

शहरी विकास मन्त्रालयका सचिव मधुसुदन अधिकारीले विपद् जोखिम न्यूनीकरण तथा व्यवस्थापन प्राधिकरणले विपद् हेर्ने विभिन्न सरकारी निकाय एवं तहगत सरकारबीच बृह्त समन्वय गर्नु उपर्युक्त हुने धारणा राख्नुभयो । जिल्ला समन्वय समिति सिन्धुपाल्चोकका प्रमुख कृष्णगोपाल तामाङ, सिन्धुपाल्चोककै जुगल गाउँपालिकाका अध्यक्ष होमनारायण श्रेष्ठ र सिन्धुपाल्चोकका प्रमुख जिल्ला अधिकारी उमेशप्रसाद ढकालले जिल्लामा यस वर्ष प्राकृतिक प्रकोपका कारण भएको क्षतिको जानकारी गराउँदै जोखिमयुक्त बस्तीको पहिचानका लागि यथाशीघ्र उच्चस्तरीय प्राविधिक टोली परिचालन गर्न माग गर्नुभयो । यसका लागि एक हप्ताभित्र जिल्ला विपद् व्यवस्थापन समितिले सिन्धुपाल्चोकको समग्र अवस्थासहित बस्ती स्थानान्तरणका लागि स्थानीय जनतालाई पायक पर्ने सुरक्षित वैकल्पिक स्थानको पहिचान गरी प्रारम्भिक प्रतिवेदन पेश गर्नेछ । भवन निर्माण विभागका उपमहानिर्देशक चक्रवर्ती कण्ठ, वन तथा भूसंरक्षण विभागका उपमहानिर्देशक बद्रिराज ढुंगाना, खानी तथा भूगर्भ विभागका उपमहानिर्देशक राजेन्द्र भण्डारीले यी कार्यका लागि आ–आफ्ना निकायको संगठनात्मक, जनशक्ति एवं बजेट अवस्थाबारे जानकारी दिनुभएको थियो ।

जल तथा मौसम विज्ञान विभागका बरिष्ठ मौसमविद् अर्चना श्रेष्ठले यो वर्ष हिउँददेखि नै औसतभन्दा बढी पानी परेको जानकारी दिनु हुँदै विगतमा असोजको पहिलो साता वर्षा अन्त्य हुने गरेको भए पनि यो वर्ष केही पछि धकेलिने संभावना देखिएकोले सावधान हुनुपर्ने बताउनुभयो । कार्यक्रममा विज्ञहरु डा।तारानिधि भट्टराई, प्रा।मेघराज धिताल, डा।जगत बस्नेत र मधुकर उपाध्यायले यसै वर्ष गएका पहिरोलाई २०७२ को भूकम्पसँग मात्र जोडेर हेर्न नमिल्ने एवं अबका दिनमा सबै खालका पहिराको जोखिमबारे अध्ययन गर्न सुझाव दिनुभयो । हरेक स्थानीय तहमा सुरक्षित स्थानको पहिचान गरी जोखिम क्षेत्रको प्राथमिकता अनुसार क्रमशः बस्ती सार्दै जानुपर्ने सुझाव पनि उहाँहरुको थियो ।

छलफलमा विपद् जोखिम न्यूनीकरण तथा व्यवस्थापन, भूसंरक्षण तथा आवाससँग सम्बन्धित सरकारी निकायका प्रमुख तथा प्रतिनिधि, सिन्धुपाल्चोकका जनप्रतिनिधि एवं विषयगत क्षेत्रका विज्ञको सहभागिता थियो । यसअघि सभामुख अग्निप्रसाद सापकोटाको पहलमा भदौ ८ गते संघीय सरकारका मन्त्री, प्रदेश मुख्यमन्त्री, जनप्रतिनिधि एवं पुनर्निर्माण र विपद् जोखिम न्यूनीकरण तथा व्यवस्थापन प्राधिकरणका प्रमुखको उपस्थितिमा सिन्धुपाल्चोक जिल्लामा बाढी र पहिरोबाट विस्थापितलाई अस्थायी बसोवासको व्यवस्था, जोखिमयुक्त बस्तीको भौगर्भिक अध्ययन र सुरक्षित स्थानमा स्थायी स्थानान्तरणका लागि उच्चस्तरीय छलफल भएको थियो । भदौ ४ गते बसेको मन्त्रीपरिषद्को बैठकले ‘देशका विभिन्न भागमा बाढी पहिरोको उच्च जोखिममा रहेका बस्तीलाई यथाशीघ्र सुरक्षित स्थानमा स्थानन्तरण शहरी विकास मन्त्रालय र पुनर्निर्माण प्राधिकरणले गर्ने र सोको समन्वय गृह मन्त्रालयले गर्ने’ निर्णय गरेको थियो ।
रासस

काठमाडौँ, काठमाडौँ उपत्यका लगायत विभिन्न जिल्लामा भूकम्पको धक्का महसुस भएको छ ।

बुधबार आज बिहान गएको भूकम्पबारे विस्तृत विवरण आउन बाँकी रहेको छ ।

मेष

मेष (चु, चे, चो, ला, लि, लु, ले, लो, अ) तर्क, विवाद र प्रतिस्पर्धामा पकड भएको समय छ । एउटै आर्थिक कारोवारमा सफलता पाइएला । साथीभाइले पनि राम्रै सहयोग जुटाउनेछन् ।

मिथुन

मिथुन (का, कि, कु, घ, ङ, छ, के, को, हा) सामाजिक प्रतिष्ठा कायम राख्न लगानी गर्ने समय आएको छ । नयाँ उद्योग वा रचनात्मक काममा जुट्ने समय छ । न्यायिक कार्यमा सफलता मिल्नेछ ।

सिंह

सिंह (मा, मि, मु, मे, मो, टा, टि, टु, टे) रोकिएका काम पुनः सुरु हुन सक्छन् िगरेका कामबाट धेरैलाई फाइदा पुग्न सक्छ । नयाँ र राम्रा अवसरहरू प्राप्त हुनेछन् । कृषि क्षेत्रमा सफलता मिल्नेछ ।

तुला

तुला )रा, रि, रु, रे, रो, ता, ति, तु, ते) अज व्यापारिक वा दैनिक कामहरू सन्तोषजनक ढंगले सम्पन्न हुनेछन् । वैदेशिक व्यापार, कृषिव्यवसाय र नोकरी गर्नेका लागि सन्तोषजनक रहनेछ ।

धनु

धनु (ये, यो, भा, भि, भु, धा, फा, ढा, भे) आज सामाजिक तथा धार्मिक कार्यमा रुची बढ्नेछ । धैर्य एवं लगनशीलताले विभिन्न अवसर दिलाउनेछ । परिश्रमअनुसार उपलब्धि पनि राम्रै पाइएला ।

कुम्भ

कुम्भ (गु, गे, गो, सा, सि, सु, से, सो, दा) दिन भाग्यशाली भएर देखा पर्नेछ । कूटनीतिक नियोगको सहयोग मिल्ला । सामाजिक कामबाट प्रशंसा प्राप्त हुनेछ । नयाँ वस्त्र एवं अलङ्कारको प्राप्ति हुनेछ ।

बृष

वृष (इ, उ, ए, ओ, वा, वि, वु, वे, वो) छोटो दुरीको लाभदायक यात्रा हुनेछ । धनार्जनका नयाँ स्रोतहरू पत्ता लाग्नेछन् । सामाजिक प्रतिष्ठा कायम राख्न लगानी गर्ने समय आएको छ ।

कर्कट

कर्कट (हि, हु, हे, हो, डा, डि, डु, डे, डो) प्रतीक्षा गरिएको काम पूरा हुनेछ । परिवारमा रमाइलो जमघट हुनेछ र अभिभावकले सन्तुष्टि जनाउने छन् । अरुलाई प्रभावित पारेर काम बन्नेछ ।

कन्या

कन्या (टो, पा, पि, पु, ष, ण, ठ, पे, पो) आज बेला बेलामा मनमा अशान्ति तथा चञ्चलता आउन सक्छ । परिवारका लागि धेरै समय दिन पाइने छैन । सरकारी निकाएको भयपनि रहला ।

बृश्चिक

वृश्चिक (तो, ना, नि, नु, ने, नो, या, यि, यु) रमाइलो यात्रा गर्ने अवसर प्राप्त हुनेछ । आकस्मिक धन लाभ हुनेछ । मिहिनेत गर्दा अधिक प्रगति हुनेछ । तर अरुको भलाइका लागि दौडधूप गर्नु पर्नेछ ।

मकर

मकर (भो,जा,जि,जु,जे,जो,ख,खि,खु,खे,खो,गा,गि) भनेको कुराको विपरीत अर्थ लाग्नसक्छ । दैनिक कामकाजमा असर पर्नसक्छ, तर ठूलाबडाको आशीर्वादले भने रोकिएको काम बन्नसक्छ ।

मीन

मीन (दि, दु, थ, झ, ञ, दे, दो, चा, चि) सानो प्रयत्नले ठूलो काम सम्पादन हुनेछ । प्रेम र मित्रताको बन्धन कसिनुका साथै वाहान लाभ हुने समय छ । धर्म,कर्म तथा समाजसेवामा मन लाग्नेछ । ( ज्यो।प। नारायणप्रसाद दुलाल

सिन्धुली, सिन्धुलीमा भएको सवारी दुर्घटनामा एक जनाको मृत्यु भएको छ । दुर्घटनामा अरु दुई जना घाइते भएका छन् । दुर्घटनामा मोटरसाइकलको पछाडि सवार सुनसरी जिल्ला, इटहरी घर भएका २६ वर्षीय यादव ढुङ्गानाको मृत्यु भएको जिल्ला प्रहरी कार्यालयले जनाएको छ । जिल्ला प्रहरी कार्यालयका प्रहरी नायब उपरीक्षक श्यामबहादुर खत्रीका अनुसार यादवको दुर्घटनामा परी टाउकामा गहिरो चोट लागेको र थप उपचारका लागि सिरहाको फूलकुमारी अस्पताल कर्जनाहा अस्पतालमा लगिएकामा अस्पतालले मृत घोषणा गरेको हो । उहाँ लघु उद्योग वित्तीय संस्था दुधौली शाखाको शाखा प्रमुखका रुपमा कार्यरत रहेको जिल्ला प्रहरी कार्यालयले जनाएको छ ।

यस्तै दुर्घटनामा मोटरसाइकल चालक बारा, निजगढ नगरपालिका –७ घर भएका २४ वर्षीय अनिल घिमिरेको हात र खुट्टामा सामान्य चोट लागेको र उहाँ आवश्यक उपचारपछि प्रहरीको नियन्त्रणमा रहेको प्रहरी नायब उपरीक्षक खत्रीले जानकारी दिनुभयो । घिमिरे आरम्भ माइक्रो फाइनान्स दुधौलीमा कार्यरत रहेको बताइएको छ ।

यस्तै दुर्घटनामा साइकल चालक सिन्धुलीको दुधौली नगरपालिका –७ सुगारे बस्ने २३ वर्षीय रासलाल अधिकारीको अगाडिका पाँच दाँत भाँच्चिएको तथा हात र खुट्टामा चोट लागेको जिल्ला प्रहरी कार्यालयले जनाएको छ । गए राति मदन भण्डारी राजमार्गमा कटारीबाट दुधौलीतर्फ आउँदै गरेको लु ५८ प २६३८ अस्थायी नम्बरको मोटरसाइकल र विपरीत दिशाबाट आइरहेको साइकल सुगारेमा ठक्कर खाई दुर्घटना भएको प्रहरीले जनाएको छ ।
रासस

काठमाडौँ, शिक्षा, विज्ञान तथा प्रविधि मन्त्रालयले भारतीय अतिक्रमणमा परेको नेपालको कालापानी, लिपुलेक र लिम्पियाधुरालाई समेटेर ‘नेपालको भूभाग र सीमासम्बन्धी स्वाध्याय सामग्री पुस्तक सार्वजनिक गरेको छ । मन्त्रालय मातहतको पाठ्यक्रम विकास केन्द्रले माध्यमिक तहका विद्यार्थीलाई नेपालको भूभाग र सिमानासम्बन्धी जानकारी दिने उद्देश्यले प्रकाशन गरेको सो पुस्तक आज शिक्षामन्त्री गिरिराजमणि पोखरेलले भर्चुअलरुपमा सार्वजनिक गर्नुभयो ।

गत २ नोभेम्बर २०१९ मा भारतले एकतर्फीरूपमा जारी गरेको नक्सामा लिपुलेक–कालापानी–लिम्पियाधुरासिहतको नेपालको भूभागलाई भारतीय क्षेत्रमा देखाएको र सो भूभागमा सडकसमेत बनाएको र नेपालले पनि आफ्नो नक्सा परिवर्तन गरी संविधानमा समेत संशोधन गरिसकेको स्थितिमा विद्यार्थी तथा जनसमुदायमा नेपालको सीमासम्बन्धी वास्तविक अवस्थाको जानकारी गराउन विज्ञको परामर्शमा पुस्तक तयार गरिएको हो ।

पुस्तकको लेखन कार्य ‘सीमा बचाऔँ अभियान’ का अभियानकर्मी कोमलचन्द्र बराल, त्रिभुवन विश्वविद्यालयका भूगोलविद् शेरबहादुर गुरुङ र भूगोलविद् एवं पाठ्यपुस्तक लेखक सहप्राध्यापक केशवराज ढकालसहितको कार्यदलबाट र संयोजन पाठ्यक्रम विकास केन्द्रका निर्देशक प्रेम भट्टराईले गर्नुभएको हो । पुस्तक तयारको सिलसिलामा पुस्तकको मस्यौदामा विभिन्न राजनीतिक ओहोदामा रहनुभएका राजनीतिक नेताबाट सुझाव प्राप्त भएको मन्त्रालयले जनाएको छ ।

यसको पाण्डुलिपिको अध्ययन गरी सीमाविद् बुद्धिनारायण श्रेष्ठ, नदीविज्ञ जगत भुसाल, विश्लेषक श्याम श्रेष्ठलगायतले सुझाव दिनुभएको थियो । यो पुस्तक गत असार १९ गतेको राष्ट्रिय पाठ्यक्रम विकास तथा मूल्याङ्कन परिषद्बाट विद्यालय तहमा सन्दर्भ सामग्रीका रूपमा प्रयोग गर्ने गरी स्वीकृत गरिएको थियो । मन्त्री पोखरेलले राष्ट्र, राष्ट्रियता र भौगोलिक अखण्डताको संरक्षणका लागि विद्यार्थीका साथै जनतामा सचेतता र संवेदनशीलताको विकास गर्नु, भूपरिवेष्टित अवस्थिति र संवेदनशील भूराजनीतिक अवस्थामा रहेको नेपालको सिमाना जोडिएका छिमेकी मुलुकसँग बेलाबेलामा देखापर्ने गरेका र भविष्यमा समेत सिर्जना हुन सक्ने सीमा विवादहरूको जानकारी राख्न र समाधानमा सहजीकरणका लागि पुस्तक सहयोगी हुने विश्वास व्यक्त गर्नुभयो ।

पुस्तकमा नेपालको प्राचीन, मध्यकालीनलगायत सन् १८१६ मा भएको सुगौली सन्धिसम्मको नेपालको सिमाना र क्षेत्रफलको विस्तार र सङ्कुचनको ऐतिहासिक सन्दर्भ, अन्तर्राष्ट्रिय सीमाको अवधारणा, सिद्धान्त, नदी सीमामा उद्गमस्थलको पहिचान, सीमा विवाद, सीमा विवाद हुने कारण र समाधानका उपायको जानकारी दिइएको छ । नेपालको सीमा निर्धारण, छिमेकी मुलुक चीन र भारतसँगको सीमा सम्बन्ध, सीमा विवाद र समाधानका प्रयास र नेपाल र भारतबीचको सीमा विवाद रहेका विशेष गरी पश्चिमोत्तर सीमा क्षेत्रका भारतद्वारा अतिक्रमित नेपालका लिम्पियाधुरा, कालापानी, लिपुलेक क्षेत्रको सीमा विवादका कारण, समाधान र यससँग सम्बन्धित ऐतिहासिक, प्रशासनिक र भूराजनीतिक प्रमाण पुस्तकमा संलग्न छन् ।

यस्तै नवलपरासी (बर्दघाट सुस्तापश्चिम) को सुस्ता क्षेत्रको अतिक्रमणसम्बन्धी छोटो जानकारी तथा नेपालको अद्यावधिक नक्सा निर्माण अभ्यास र नक्साको परिचय र प्रयोगसम्बन्धी विषयवस्तु पनि समावेश गरिएका छन् ।रासस

किमाथाङ्का, सङ्खुवासभाको सिलिचोङ गाउँपालिका–१ का पहिरो पीडितलाई अरुण तेस्रो परियोजनाले रु १० लाख सहयोग गरेको छ । निर्माणाधीन ९०० मेगावाट अरुण तेस्रो आयोजना एसजेपिडिसी, जेपी एसोसियटर्स र पट्टेल इन्जिनीयरिङका कर्मचारीले पहिरो पीडितलाई रु १० लाख सहयोग गरेको सतलज कम्पनीले जनाएको छ ।

जिल्ला प्रशासन कार्यालयमा गाउँपालिका अध्यक्ष रामबहादुर कुलुुङ र प्रमुख जिल्ला अधिकारी जीवनप्रसाद आचार्यलाई आज सतलज कम्पनीका आरसी सुलेरियाले सो रकमको चेक हस्तान्तरण गर्नुभएको हो । प्रजिअ आचार्यले सो चेक गाउँपालिका अध्यक्ष कुलुङलाई प्रदान गर्नुभयो ।

सतलज कम्पनीले दिएको रकम पहिरो पीडितको व्यवस्थापनमा खर्च गरिने गाउँपालिका अध्यक्ष कुलुङले बताउनुभयो । विस्थापित परिवारलाई हाल चित्रे, पौखमटार र बुधबारेमा टेण्ट टाँगेर राखिएको छ । गत असार २८ गते राति गएको पहिरोले सिलिचोङ–१ का १०४ घर विस्थापित भएका छन् भने नौ घर बगाउँदा ११ जना बेपत्ता भएका थिए ।
रासस

काठमाडौँ, काठमाडौँका असन, इन्द्रचोकलगायतका भित्री वस्तीलाई व्यवस्थित बनाउन त्यस क्षेत्रमा फुटपाथ पसल हटाउने अभियान शुरु गरिएको छ । वस्ती वरपरका स्थानमा पछिल्लो समयमा बढ्दै गएको फुटपाथ पसलले सवारी आवागमनका साथै पैदलयात्रुलाई समस्या परेपछि जागरुक युवा समाजले अभियान थालेको हो ।

सार्वजनिक बाटो ओगटेर राखिएका यस्ता पसलले भीडभाड बढ्न गई वस्तीको सौन्दर्यता कमी आउने, विभिन्न रोगका सङ्क्रमणको जोखिम थपिने र व्यापारिक कारोबारमा कर चुहावट हुने भएकाले अभियान शुरु गरिएको बताइएको छ । स्थानीय युवाको सक्रियता रहेको अभियानले स्थानीय तह, सुरक्षाकर्मीलगायतसँग समन्वय गरी सम्पदामाथिको अतिक्रमण निरुत्साहित गर्ने, प्राचीन महत्वका स्थल तथा ऐतिहासिक वस्तुको संरक्षण गर्ने लक्ष्य राखेको छ ।

काठमाडौँ महानगरपालिका­२५का सदस्य विनोद तुलाधरले भित्री वस्ती क्षेत्रमा पसल खोलिएका कारण विगतमा धेरै पैदलयात्रु दुर्घटना भई घाइते तथा केहीको मृत्यु समेत भएको अवस्थामा शुरु गरिएको अभियानको प्रशंसा गर्नुभयो । अभियानका सल्लाहकार समेत रहनु भएका तुलाधरले यस प्रकारका पसललाई कुनै पनि हालतमा बैधता दिन नहुने बताउनुभयो ।
रासस

किमाथाङ्का, विश्वव्यापी कोरोना महामारीका कारण यो वर्ष रुद्राक्ष व्यवसाय सङ्कटमा परेको छ । कोरोना भाइरस सङ्क्रमण रोकथाम तथा नियन्त्रणका लागि भएको बन्दाबन्दी तथा निषेधाज्ञाका कारण रुद्राक्ष खरिद गर्ने व्यापारी भारत तथा चीनबाट आउन नसक्दा यो व्यवसाय सङ्कटमा परेको हो । विशेषगरी नेपालमा उत्पादित रुद्राक्ष भारत तथा चीनमा बिक्री हुँदै आएको छ । रुद्राक्षको मुख्य कारोवार हुने साउन र भदौ महिनामा नै कोरोना भाइरस सङ्क्रमण रोकथाम तथा नियन्त्रणका लागि भएको बन्दाबन्दीले यसको कारोवार ठप्प भएको रुद्राक्ष व्यवसायीको गुनासो छ ।

गत वर्ष रुद्राक्ष व्यापारबाट राम्रो आम्दानी गरेका व्यवसायी यो वर्ष भने करोडौंको लगानी डुब्ने हो कि भन्ने चिन्तामा रहेको रुद्राक्ष व्यवसायी राजकुमार घिमिरेले बताउनुभयो । कोरोना भाइरस सङ्क्रमणका कारण भएको बन्दाबन्दीले चिनियाँ व्यापारी नेपाल आउने सम्भावना निकै कम रहेको उहाँकोे भनाइ छ । रुद्राक्ष खरिद गर्न गत वर्ष ३० भन्दा बढी चिनियाँ व्यापारी सङ्खुवासभा आएका थिए । यो वर्ष भने मुस्किलले १५ जना चिनियाँ व्यापारी यहाँ आइपुगेको व्यवसायी धिमिरेले बताउनुभयो । चिनियाँ व्यापारीले सङ्खुवासभाका विभिन्न स्थानमा किसानका रुद्राक्ष बगान नै ठेक्का लिएका छन् । कोरोना भाइरसको त्रासका कारण अधिकांश चिनियाँ व्यापारी रुद्राक्ष टिप्ने मुख्य सिजनमा सङ्खुवासभा आउन सकेका छैनन् । “गत वर्ष आफ्नो टोलीले रु २० करोड मूल्य बराबरको रुद्राक्षको कारोवार गरेका थियौं”, व्यवसायी धिमिरेले भन्नुभयो, “यो वर्ष मुस्किलले १०÷१२ करोड रुपैयाँको कारोवार हुने देखिन्छ ।”

गत वर्ष सङ्खुवासभामा रु दुई अर्बभन्दा बढी मूल्य बराबरको रुद्राक्षको कारोवार भएको रुद्राक्ष ब्यवसायी सङ्घका अध्यक्ष चक्रबहादुर बिसुङ्खेले जानकारी दिनुभयो । उहाँले भन्नुभयो, “कोरोना भाइरसका कारण चिनियाँ र भारतीय व्यापारी सङ्खुवासभा आउने सम्भावना अत्यन्त न्यून हुँदा करोडौं रुपैयाँको लगानी डुब्ने देखिएको छ ।” विगतका वर्षमा चिनियाँ व्यापारीले सदरमुकाम खाँदबारी, तुम्लिङटार र चैनपुरलगायत होटल भरीभराउ हुन्थे । तर यो वर्ष कोरोना भाइरसका कारण होटल समेत सुनसान छन् ।” अघिल्लो वर्ष असारको अन्तिम सातादेखि रुद्राक्ष खरिद गर्न र ठेक्का लिएका रुद्राक्ष टिप्न चिनियाँ व्यापारी गाउँ गाउँ पुग्थें । यो वर्ष रुद्राक्ष टिप्ने बेला हुँदा समेत कुनै व्यापारी नआउँदा करोडौं रुपैयाँको लगानी गर्नेहरु आर्थिक समस्यामा पर्न थालेको अध्यक्ष बिसुङ्खेको भनाइ छ ।

गुणस्तरीय रुद्राक्ष फलाउन धेरै व्यवसायीले गाउँ गाउँका रुद्राक्ष ठेक्कामा लिएर बोटमा औषधि लगाएका छन् । बाँकी रकम बोटबाट टिपेपछि दिने शर्तमा व्यवसायीले अधिकांश रुद्राक्ष धनीलाई अग्रिम पेश्की दिएका छन् । न त पेश्की फर्कन्छ न त बेचेर आम्दानी गर्ने स्थिति नै छ । आफूले वर्षौंदेखि रुद्राक्ष व्यवसायमा लगानी गरे पनि यो वर्ष जस्तो सङ्कट कहिल्यै नआएको ब्यवसायी देवराज पुरीले बताउनुभयो । गुणस्तरीय रुद्राक्ष फलाउने नाममा रु ५० लाख बढीको औषधि हालियो तर रुद्राक्षको बजार चम्कने कुनै सम्भावना छैन । यो वर्ष धेरै कृषक र व्यवसायीको लगानी डुब्ने अध्यक्ष बिसुङ्खेको भनाइ छ ।

ऋणपान गरेर भएपनि गाउँगाउँ पुगेर व्यवसायीले रुद्राक्षमा ठूलो लगानी गरेका छन् । वर्षौंको कमाई एकैछाक हुनेगरी औषधि र मलजल गरेका छन् तर रुद्राक्ष खरिदका लागि चिनियाँ र भारतीय व्यवसायी आएनन् । अघिल्लो वर्ष फाट्टफुटट्ट मात्र औषधि प्रयोग हुँदै आएकोमा यो वर्ष धेरैले रुद्राक्ष बोटमा रु एक करोडदेखि पाँच करोडसम्मको औषधि र मल प्रयोग गरेका छन् । अधिकांश बोटमा लामो वर्षात्का कारण रुद्राक्ष अडिएको छैन । अडिएको रुद्राक्ष समेत बिक्री हुने सम्भावना नहुँदा धेरैको लगानी डुब्ने अवस्था रहेको खाँदबारी नगरपालिका–८ का व्यवसायी भिम कार्कीले बताउनुभयो । उहाँले भन्नुभयो, “आफूले तीन सयभन्दा बढी बोट ठेक्कामा लिएर औषधि, मल र भिटामिन प्रयोग गरेको छु । तर चिनियाँ ब्यापारी नआउने भएपछि रुद्राक्षमा गरेको लगानी खेर जान अवस्था आएको छ ।” यसपाली चिनियाँ व्यापारी आउन सकेको भए रुद्राक्षको बोट ठेक्कामा करिब रु ३० लाखको लगानी भएपनि रु एक करोड जतिको व्यापार हुन्थ्यो भन्दै उहाँले यसपालि रुद्राक्षले मूल्य नपाउने प्राय निश्चित भएको बताउनुभयो ।

संखुवासभामा केही वर्षअघिदेखि रुद्राक्ष व्यवसायीले गाउँ गाउँका कृषकको रुद्राक्षको बोट नै वार्षिक रूपमा ठेक्कामा लिएर लगानी गर्दै आएका छन् । कतिपय नेपाली व्यवसायीले चिनियाँ व्यापारीसँग सहकार्य गरेरै कृषकको रुद्राक्ष बोटमा लगानी गर्दै आएका छन् भने कतिले आफ्नै मात्र लगानीमा पनि गाउँ गाउँका बोटमा रकम लगानी गरेका छन् । सङ्खुवासभा र भोजपुरको उत्तरी क्षेत्रका किसानको मुख्य आम्दानीको स्रोत रुद्राक्ष नै हो । धेरै परिश्रम, गोडमेल र मलजल गर्नु नपर्ने तथा बजार मूल्य पनि राम्रै पाउने भएपछि कृषकले खेतीयोग्य जमिन मासेर रुद्राक्ष खेती लगाउन थालेका छन् ।

काठमाडौं, राजधानीको स्वयम्भूबाट १० किलो गाँजाको धुलोसहित दुई जनालाई प्रहरीले पक्राउ गरेको छ ।

पक्राउ पर्नेमा चन्द्रागिरी नगरपालिका–१३ पुरानो नैकापका २२ वर्षीय सुवर्ण पौडेल र धादिङ थाक्रे गाँउपालिका–५ घर भएका २७ वर्षीय सागर लामा छन् ।महानगरीय प्रहरी वृत्त स्वयम्भू र सशस्त्र प्रहरी बलको संयुक्त टोलीले उनीहरुलाई भगवानपाउ नजिकैबाट पक्रेको हो ।

लागु औषध मुद्दामा अदालतबाट ७ दिनको म्याद लिएर उनीहरुमाथि अनुसन्धान भइरहेको महानगरीय प्रहरी वृत्त स्वयम्भूका डीएसपी निरन्जनदत्त भट्टले रातोपााटीलाई जानकारी दिए । भगवानपाउ तर्फ आउँदै गरेको बा.२ज ५७०९ नम्बरको ट्याक्सीमा गाँजा कारोबारी चढेको सुराकको आधारमा स्वयम्भू प्रहरी र सशस्त्र प्रहरीले संयुक्त अपरेशन चलाएका थिए ।

ट्याक्सीलाई नियन्त्रणमा लिएर सर्च गर्दा सुवर्ण र सागरको साथमा धुलो गाँजा फेला परेको थियो । गाँजा कारोबारमा संलग्नहरुले सो गाँजा मकवानपुरको पालुङबाट ल्याएको प्रहरीलाई बताएका छन् ।

भक्तपुर,प्रतिनिसभाका सांसद एवं पूर्वमन्त्री महेश बस्नेतले गुण्डुका ५६० घरलाई गुर्जोको बिरुवा वितरण गर्नुभएको छ । सूर्यविनायक नगरपालिका वडा नं. ७ को आयोजना तथा गुर्जो अभियान्त तथा नेपाल सरकारका उपसचिव कमलबहादुर राजलवटको सौजन्यमा आज यहाँका भएको कार्यक्रममा प्रत्येक घरमा गुर्जो पुर्याउने लक्ष्यका साथ उहाँले बिरुवा वितरण गर्नु भएको हो ।

नेपाल कम्युनिष्ट पार्टी (नेकपा)का केन्द्रीय सदस्य समेत रहनु भएका बस्नेतले विश्वमा महामारीको रुपमा फैलिएको कोरोना भाइरस (कोभिड–१९)को संक्रमण नियन्त्रण तथा रोग प्रतिरोधात्मक क्षमता बढाउन आयुवेर्दिक औषधिको राजाको रुपमा रहेको गुर्जो घरघरमा पुर्याउने उदेश्यले यसको विरुवा वितरण गर्नु भएको हो ।

विभिन्न प्रकारका रोगहरुसँग लड्ने क्षमतालाई बढाउने, रुघा, खोकी, ग्यास्टिक, मानसिक समस्यालाई कम गर्ने, पाचन शक्ति बढाउने, बाथ, पेट सम्बन्धी समस्या समाधान गर्ने, स्वास प्रश्वासको समस्या समाधान गर्ने, आँखाको विकास र कमजोरी हटाउने, छाला सम्बन्धी समस्या हटाउने, चाँया पोतो हटाउनेलगायत महत्वपूर्ण आयुवेर्दिक औषधीको रुपमा लिइने गुर्जोलाई प्रत्येक घरमापुर्याउने लक्ष्य लिएको छ ।

गुर्जोको बितरण पछि बोल्दै सांसद बस्नेतले सरकार तथा भक्तपुरमा भइरहेको समग्र विकासको सकरात्मक विरोध गर्ने जनताको अधिकार रहेको उल्लेख गर्दै विकल्प विनाको विरोधको औचित्य नभएको स्पष्ट पार्नुभयो । कुनै पनि समस्या वा विरोधले विकल्प सहित आएको हुने प्रति सचेत गराउँदै उहाँले एउटा कोठामा बसेर विरोधको नाममा सामाजिक सञ्जाल तथा प्रत्यक्ष रुपमा विकल्प सहितको विरोध गर्न चुनौति दिनुभयो ।
उहाँले भन्नुभयो, ‘लकडाउनको समयमा कतिपय मिडिया, नेता तथा सामाजिक सञ्जालमा अनावश्यक तर्कहरु गरी समय वर्वाद गरिरहेको, समाजलाई भ्रमित पार्ने कार्य भइरहेको छ । सामाजिक सञ्जालमा गाली गलैच गरी सामाजिक सञ्जाललाई फोहोर बनाई रद्धिको टोकरीमा लगाई गन्हाएर बस्नुभन्दा सामाजिक समृद्धिको अभियानमा लाग्नुपर्छ, मानविय जीवन सफल हुन्छ । विकल्पसहितको विरोध गर्नुस् । विरोधको नाममा एउटा कालो कोठामा बसेर सामाजिक सञ्जालको दुरुपयोग नगर्नुस् ।’

स्वावलम्बी अर्थतन्त्रमा अघि बढेको उल्लेख गर्दै उहाँले कोभिड–१९ का कारण व्यापार घाटा आत्याधिक रुपमा सुधार आइरहेको बताउनुभयो । लकडाउनको समयमा समयको सदुपयोग गर्दै कृषिमा आत्मनिर्भताको व्यापक रुपमा अघि बढाएको उल्लेख गर्दै उहाँले हरेक महामारि तथा संकटले अवसर लिएर आउने र त्यसलाई सदुपयोग गर्नुपर्नेमा जोड दिनुभयो ।
कोरोनाका कारण गुर्जो, अदुवा, वेसारलगायतका परम्परागत जडिबुटीको बैज्ञानिक प्रणाली पुनः व्युझिएको उल्लेख गर्दै उहाँले परम्परागत जडिबुटीका बैज्ञानिक प्रणालीलाई विकास गर्नुपर्नेमा जोड दिनुभयो ।

परम्परागत प्रणालीलाई उद्योगमा रुपान्तरण गर्नुपर्ने गर्दै असंख्य रोजगारी तथा आत्मनिर्भरतामा लैजानुपर्ने बताउँदै उहाँले भन्नुभयो, ‘विभिन्न शिर्षकमा सरकारले सहुलियत दरमा ऋण उपलब्ध गराउने व्यवस्था गरेको सोही अनुसार अवसरलाई सदुपयोग गर्दै रोजगारी तथा उत्पादन हुँदै उद्योगमा रुपान्तरण गर्नुपर्छ ।’

भक्तपुरका सडकहरुमा हरियाली प्रवद्र्धनका कार्यक्रमहरु भइरहेको र अबका दिनमा गुर्जोलगायतका फलफुलका विरुवाहरु रोप्ने अभियान समेत चलाउनुपर्ने बताउँदै उहाँले सरकार, नीजि तथा उद्योगीहरु सवै मिलेर मुलुक बनाउने आव्हानसमेत गर्नुभयो ।
गुर्जोको फाईदा तथा समस्याको बारेमा अभियान्ता राजलवतका अुनसार पाँच वर्षभन्दा कम उमेरका बालबालिका, गर्भवती महिलाले प्रयोग गर्नु नहुने साथै व्लड प्रेसर कम भएकाले विरे नुनको प्रयोग गरी मात्र खानका लागि समेत सचेत गराईएको छ ।

वातावरणीय तथा प्राकृतिक रुपमा काठमाडौँ उपत्यकाको सवैभन्दा सुन्दर स्थानको रुपमा गुण्डु रहेको उल्लेख गर्दै कार्यक्रममा वडाध्यक्ष रविन्द्र सापकोटा, एकिकृत बागमती सभ्यताका प्रमुख नवराज प्याकुरेलले गुर्जोको वर्तमान समयमा आवश्यकता र त्यसलाई आयुवेर्दीक औषधीको रुपमा प्रयोग वर्तमान समयको अनिवार्यता जस्तै भएको उल्लेख गर्नुभयो ।

भक्तपुर, भक्तपुरको सिद्धि स्मृति अस्पतालका स्वास्थ्यकर्मीहरूमा कोभिड–१९ को सङ्क्रमण पुष्टि भएको छ । यस कारण अस्पताल आइतबारदेखि बन्द गरिएको छ ।

अस्पतालका निर्देशक श्यामसुन्दर धौभडेलले बिहीबार ३९ जना स्वास्थ्यकर्मीको स्वाब सङ्कलन गरी परीक्षणको लागि पठाइएकोमा २१ जनाको पोजेटिभ परिणाम देखिएको जानकारी दिए । ती सङ्क्रमित स्वास्थ्यकर्मीलाई आइसोलेसनमा पठाइसकेपछि अस्पताल निष्सङ्क्रमण गरी चरणबद्ध अस्पताल सञ्चालन गरिने पनि उनले जानकारी दिए ।

भक्तपुरमा बालबालिकाको लागि आकस्मिक सेवा भएको अस्पताल अरु नभएकोले सकेसम्म चाँडो चरणबद्ध रुपमा अस्पताल सञ्चालन गरिने छ । सङ्क्रमित स्वास्थ्यकर्मीहरूमध्ये सुरुका दुई जना भक्तपुर खरिपाटीस्थित आइसोलेसन सेन्टरमा पठाइएको र अरु १८ जना जनालाई सोमबार पठाउने तयारी भइरहेको छ ।

काठमाडौ, सरकारको प्रवक्तामा परराष्ट्रमन्त्री प्रदीप ज्ञवाली नियुक्त भएका छन् । सोमबार हिजो साँझ बसेको मन्त्रिपरिषद्को बैठकले मन्त्री ज्ञवालीलाई प्रवक्तामा नियुक्त गर्ने निर्णय गरेको हो ।

यसअघि अर्थमन्त्री डा. युवराज खतिवडा सरकारका प्रवक्ता थिए । उनको राष्ट्रियसभा सदस्यको कार्यकाल सकिएर राजीनामा दिएका थिए ।

काठमाडौँ, मूल्य बृद्धि रोक्न भन्दै भारतले प्याज निर्यातमा प्रतिबन्ध लगाएको छ । कटिङ्ग गरिएका र पाउडर फार्मबाहेकका सबै खाले प्याज निर्यातमा प्रतिबन्ध लगाइएको बीबीसी हिन्दीले जनाएको छ । भारतले प्याज निर्यातमा रोक लगाएपछि नेपालमा प्याजको मूल्य बढ्न सक्ने आकलन सुरू भएका छन् ।

आन्तरिक खपतलाई परिपूर्ति गर्न र बढ्दो मूल्यलाई नियन्त्रणमा लिन यस्तो कदम चालिएको भारत सरकारले जनाएको छ। हाल दिल्ली लगायतका शहरमा प्याज प्रतिकिलो ३५ देखि ४० भारतीय रुपैयाँमा बिक्री भइरहेको छ ।

पर्वत, नेपाल विद्युत् प्राधिकरण पर्वत वितरण केन्द्रमा कार्यरत एक कर्मचारीको विद्युत्को पोलबाट खसेर सोमबार साँझ मृत्यु भएको छ । पर्वतको कुश्मा नगरपालिका–७ खरेहामा विद्युत् मर्मतका लागि पोल चढेका ३५ वर्षीय भोलाराम शर्माको पोलबाट खसेर मृत्यु भएको हो ।

बाग्लुङ नगरपालिका–१ रामरेखा घर भएका शर्माको पोलबाट खसेपछि उपचारका लागि पर्वत अस्पतालमा पुर्याउँदा मृत्यु भएको जिल्ला प्रहरी कार्यालय पर्वतका प्रहरी निरीक्षक बुद्धिप्रसाद सुवेदीले जानकारी दिनुभयो ।

अवरुद्ध भएको विद्युत् लाइन मर्मतका लागि शर्मा साँझ साढे ७ बजे पोलमा चढेका थिए । उनलाई करेन्ट भने नलागेको वितरण कन्द्रले जनाएको छ । मृतक शर्मा नेपाल विद्युत् प्राधिकरणमा तेस्रो तहको इलेक्ट्रिसियन पदमा कार्यरत थिए । शव परीक्षणका लागि पर्वत अस्पतालको शवगृहमा राखिएको छ । आज परीक्षण गरेर परिवारलाई बुझाइने प्रहरीले जनाएको छ ।
रासस