२५ बैशाख २०८३ काठमाडौं- काठमाडौंको माइतीघर मण्डला मा संयुक्त सुकुम्बासी मोर्चाले सरकारविरुद्ध प्रदर्शन गरेको छ। बिनाविकल्प र उचित व्यवस्थापन नगरी देशभरका सुकुम्बासी बस्तीमा डोजर चलाएर नागरिकलाई बिचल्ली बनाइएको आरोप लगाउँदै प्रदर्शनकारीहरूले हातमा थाल र चम्चा लिएर विरोध जनाएका हुन्।

प्रदर्शनका क्रममा सहभागीहरूले ‘विकासको नाममा विस्थापन बन्द गर’, ‘हुनुपर्छ सबैलाई बराबर’ तथा ‘तीन दिन बिदा, सुकुम्बासी अलबिदा’ लगायतका नारा लेखिएका प्लेकार्ड र ब्यानर प्रदर्शन गरेका थिए।

संयुक्त सुकुम्बासी मोर्चाको आयोजनामा भएको प्रदर्शनमा सरकारले विभिन्न जिल्लामा सञ्चालन गरिरहेको सुकुम्बासी बस्ती खाली गर्ने अभियानको विरोध गरिएको हो। पछिल्लो समय देशका विभिन्न स्थानमा सुकुम्बासी बस्ती हटाउने सरकारी निर्णयविरुद्ध विरोध प्रदर्शन भइरहेका छन्।