असार  २५, २०८२ काठमाडौं । विपद् कार्यकारी परिषद्ले रसुवागढीस्थित मितेरी पुल पुनः सञ्चालनमा ल्याउन चीनसँग औपचारिक आग्रह गर्ने निर्णय गरेको छ। मंगलबार साँझ बसेको परिषद्को बैठकले पुलको महत्त्वलाई ध्यानमा राख्दै यस्तो निर्णय गरेको हो।

बैठकपछि विपद् जोखिम न्यूनीकरण तथा व्यवस्थापन प्राधिकरणका कार्यकारी निर्देशक दिनेश भट्टले बुधबार पत्रकार सम्मेलनमार्फत उक्त निर्णय सार्वजनिक गरेका हुन्।

उनका अनुसार मितेरी पुल नेपाल–चीनबीचको एक प्रमुख नाका भएकोले त्यसलाई यथाशीघ्र सञ्चालनमा ल्याउन आवश्यक देखिएको हो। “पुलसहितको सडक चीनकै सहयोगमा निर्माण भएको हुँदा पुनः सञ्चालनका लागि चीनसँग पुनः सहकार्यको अनुरोध गर्ने निर्णय भएको हो,” भट्टले जानकारी दिए। हाल पुल क्षेत्रको सडक मर्मत तथा सुधार कार्य भइरहेको छ।