काठमाडौं । भिजिट भिसा प्रकरणमा मुछिएका गृह मन्त्रालयका कर्मचारीमाथि कारबाहीको माग गर्दै प्रतिपक्षी सांसदहरुले बुधबारको संघीय संसद बैठक अवरुद्ध गरेका छन्। उनीहरुले गृहमन्त्री रमेश लेखकको राजीनामा माग गर्दै नाराबाजी गरेका हुन्।

सभामुख देवराज घिमिरेले बैठक सुरु भएको घोषणा गरेलगत्तै प्रतिपक्षी दलका सांसदहरु उठेर नाराबाजीमा उत्रिएका थिए। उनीहरुले सरकारको असफलताप्रति आक्रोश व्यक्त गर्दै गृहमन्त्रीको पदबाट राजीनामा माग गरे।

सत्तारुढ दलका सांसदहरुले संसद अवरुद्ध गरेर जनताको आवाज दबाउने काम नगरिन आग्रह गरे भने सभामुख घिमिरेले सांसदहरुलाई शान्त रहन र दलगत आधारमा बोल्न समय दिने प्रस्ताव राखे। तर प्रतिपक्षी सांसदहरुले त्यसलाई अस्वीकार गर्दै नाराबाजी जारी राखे।