पुस २५, २०८० तनहुँ : तनहुँको भिमाद नगरपालिका-३ सुनाकोट बराथुम्कीमा बुधबार बिहान भएको जिप दुर्घटनामा २ जनाको मृत्यु भएको छ । उक्त दुर्घटनमा परी चालकसहित जिपमा सवार १० जना यात्रु घाइते भएका छन् ।

पोखराबाट पाल्पाको रामपुर जाँदै गरेको ग१ज ६३५६ नम्बरको जिप बिहान साढे ९ बजेतिर सडकबाट करिब १५० मिटर तल खोलामा खसेको जिल्ला प्रहरी कार्यालय तनहुँका सूचना अधिकारी डीएसपी मोहनबहादुर खाँणले जानकारी दिए ।

बौदीकाली गाउँपालिका-२ नवलपुरका ४२ वर्षीय रुमबहादुर विक र ५५ वर्षीय जेमलाल दरैको उपचारका क्रममा जीपी कोइराला राष्ट्रिय श्वासप्रश्वास उपचार केन्द्र बेलचौतारा तनहुँमा मृत्यु भएको डीएसपी खाँणले जानकारी बताए । प्रहरीले दुर्घटनाका बारेमा अनुसन्धान भइरहेको जनाएको छ ।