असाेज २१, २०८० काठमाडौं : इजरायलमा हमासले गरेको आक्रमणपछि त्यहाँ रहेका नेपालीहरूका स्थिति जानकारी लिन सरकारले संयन्त्र बनाएको छ। परराष्ट्र मन्त्री एनपी साउदको नेतृत्वमा समन्वय संयन्त्र बनाइएको हो।

---

आइतबार प्रधानमन्त्री पुष्पकमल दाहालसहितको उपस्थितिमा बसेको बैठकले समन्वय संयन्त्र गठन गरेको परराष्ट्र मन्त्री साउदले प्रतिनिधि सभा बैठकमा जानकारी गराए।

---

‘यस संयन्त्रले घटनाको निरन्तर अनुगमन र बस्तुस्थितिको समग्र मूल्यांकन गरेर नेपालीहरूको अवस्था पहिचान गर्ने, उद्धार गर्नुपर्ने भए गर्ने, समन्वय तथा सहयोगलगायत कार्य गर्नेछ,’ मन्त्री साउदले भने।

---

इजरायलमा रहेका नेपालीको सुरक्षाका लागि परराष्ट्र मन्त्रालयले आफ्नो संयन्त्र र सम्पर्क परिचालन गरेको उनले बताए। नेपालीहरूको उद्धारका लागि त्यहाँ रहेको दूतावासलाई आग्रह गरिएको पनि उनले जानकारी दिए।

---

इजरायलमा चार हजार पाँच सय जना नेपालीहरू केयरगिभरको रूपमा रहेको र दुई सय ६५ जना विद्यार्थी अध्ययनरत रहेको परराष्ट्र मन्त्री साउदले बताएका छन्।