• 7:04 pm

मुग्लिन–नारायणगढ सडकखण्ड फेरि अवरुद्ध

प्रकाशित मिति

२०८० श्रावण १४ गते, आईतवार १०:४०

१४ श्रावण २०८०, काठमाडौँ: चितवनको मुग्लिन–नारायणगढ सडकखण्ड फेरि अवरुद्ध भएको छ । आज बिहान करिब पौने १० बजेदेखि सडक अवरुद्ध भएको हो । इच्छाकामना गाउँपालिका–६, कालीखोला पुलनजिकै सडकमाथिबाट पहिरो खसेकाले बाटो अवरुद्ध भएको सडक डिभिजन कार्यालय भरतपुरले जनाएको छ ।


उक्त स्थानमा अहिले वर्षा भइरहेको र लेदो पनि बगिरहेको सो कार्यालयका सूचना अधिकारी चण्डेश्वर साहले जानकारी दिए । पहिरो पन्छाउन केही समय लाग्ने उनले बताए । “पानी धेरै परिरहेको छ, लेदो पनि आइरहेको छ,” उनले भने, “पानी पर्न कम भएपछि पहिरो पन्छाउन थालिनेछ ।”


पहिरो पन्छाउनका लागि सडक डिभिजनको ‘मेसिन’ तयारी अवस्थामा रहेको उनले जानकारी दिए । लेदो खसिरहेकाले सो स्थानमा सवारीसाधनको आवगमन ठप्प भएको उनले बताए । “सडक खुलाउन कति समय भनेर अहिले नै भन्न सकिँदैन । लेदो आइरहेको छ, यस्तो अवस्थामा सवारीसाधन चलाउन सम्भव हुँदैन ।”


सोही स्थानमा हिजो पनि केही समय सडक अवरुद्ध भएको थियो ।

प्रतिकृया