महानगर प्रमुख बालेन सहित तीन जनालाई प्राधिकरणले सोध्यो स्पष्टीकरण

प्रकाशित मिति

२०८० असार १ गते, शुक्रबार ०४:५४

balen e1684647734787

१ असार २०८०, काठमाडौँ : नेपाल नागरिक उड्डयन प्राधिकरणले काठमाडौं महानगर प्रमुख बालेन्द्र शाह (बालेन) सहित तीन जनालाई स्पष्टीकरण सोधेको छ ।


सिनामंगलस्थित त्रिभुवन अन्तर्राष्ट्रिय विमानस्थल क्षेत्रमा पूर्वजानकारी र सूचना नदिई फेन्सिङ तार काटेको विषयमा प्राधिकरणले स्पष्टीकरण सोधेको हो। प्राधिकरणका अनुसार महानगरको ९ नम्बर वडामा पर्ने प्राधिकरणको विमानस्थल क्षेत्रसँग सम्बन्धित क्षेत्रमा बिहीबार महानगरले नगरप्रहरीसहितको टोली पठाई फेन्सिङ तार काटिदिएको थियो ।


प्राधिकरणको विमानस्थल क्षेत्रसँग सम्बन्धित क्षेत्रमा बिहीबार महानगरले नगरप्रहरीसहितको टोली पठाई फेन्सिङ तार काटेको नगर प्रहरी एसपी दिनेश कुमार अर्याललेसमेत जानकारी दिएका छन्।


सोही विषयमा प्राधिकरणले महानगर प्रमुखसहित ३ जनालाई स्पष्टीकरण सोधेको हो। पत्र प्राप्त भएको ७ दिन भित्र लिखित जवाफ पेश गर्न प्राधिकरणले चेतावनी दिएको छ। प्राधिकरणले यस कार्यलाई कानुनविपरीत भएको बताएको छ।


पत्रमा भनिएको छ, ‘प्राधिकरणका कर्मचारीले फेन्सिङ तार नकाट्न अनुरोध गर्दा पनि अटेर गरी जबर्जस्ती कार्य गरेको, यससम्बन्धी पत्र तथा जानकारी माग्दा नगर प्रमुखको आदेशबमोजिम कार्य गरेको र त्यहीँ सोध्न जानुहोस् भनी जवाफ दिएकाले सो कार्यमा तपाईं (मेयर) को संलग्नता देखिएकाले प्राधिकरणको ऐनको दफा ७ को कसुरमा ७ दिनभित्र लिखित स्पष्टीकरण पेस गर्नू।’


प्राधिकरणले यसै विषयमा महानगरका नगर प्रहरी प्रमुख राजुनाथ पाण्डे र वडा नम्बर ९ का अध्यक्ष रामजी भण्डारीलाई पनि सात दिनभित्र लिखित स्पष्टीकरण बुझाउन भनेको छ ।


मेयर बालेनले प्राधिकरणको ऐन उल्लंघन गरेको पुष्टि भएमा ५० हजार रुपैयाँसम्म जरिवाना तिर्नुपर्ने व्यवस्था छ साथै जरिवाना नतिरेमा उडानमा प्रतिबन्ध लगाउन सकिने प्राधिकरणको कानुनमा व्यवस्था रहेको छ ।

प्रतिकृया