८ वैशाख २०८०, काठमाडौँ: राष्ट्रिय स्वतन्त्र पार्टी (रास्वपा) का तनहुँ क्षेत्र नम्बर एक प्रतिनिधिसभा सदस्यका उम्मेदवार स्वर्णिम वाग्लेका बुवा चढ्ने गाडी गएराति तोडफोड भएको छ । वाग्लेका बुवा जीवनराम वाग्ले चढ्ने गाडी तोडफोड भएको जिल्ला प्रहरी कार्यालय, तनहुँले जनाएको हो ।

प्रहरीका अनुसार तनहुँको व्यास नगरपालिका-३ दमौलीमा पार्किङ गरिराखेको बा ११ च ४२५० नम्बरको मारूती गाडी तोडफोड भएको हो । जिल्ला प्रहरी कार्यालय तनहुँका प्रवक्ता डिएसपी मोहनबहादुर खाँणले गाडी तोडफोड घटनाबारे शुक्रबार बिहान थाहा भएको बताए ।

घटनाको सूचना प्राप्त गरेलगत्तै जिल्ला प्रहरी कार्यालय तनहुँको टोली अनुसन्धानमा खटिएको उनले जानकारी दिए । तोडफोड गर्ने अज्ञात समूहको खोजी जारी रहेको उनको भनाई छ। गाडीको पछाडिको साइडको सिसा फुटेको छ ।

स्वर्णिमका बाबु जीवनराम गएराती दमौलीस्थित एक होटलमा बसेका थिए। होटलमा पार्किङ नभएका कारण गाडि सडकमा राखेको अवस्थामा तोडफोड भएको प्रहरीले जनाएको छ ।