४ वैशाख २०८०, काठमाडौँ: चलचित्र ‘गोर्खा : बिनिथ द ब्रेभरी’ अमेजन प्राइममा रिलिज हुने भएको छ । प्रदीप शाही निर्देशित उक्त चलचित्र केही समय अगाडि प्रदर्शनमा आएको थियो । अब यो चलचित्र अमेजन प्राइममा रिलिज हुने भएको हो । चलचित्र ‘१९१५ लेजेन्ड अफ गोर्खाज’ को नामबाट अमेजन प्राइममा रिलिज हुन लागेको हो ।

अमेजन प्राइम अमेरिकामा चलचित्र मे २ देखि रिलिज हुने छ । साथै बेलायत, अष्ट्रेलिया, जापान, तालिवान र दक्षिण कोरियामा रिलिजको तयारी भैरहेको निर्माण पक्षले जनाएको छ । निर्देशक शाहीको कथा लेखन रहेको चलचित्रमा समिर गुरुङ, गौमाया गुरुङ, स्टुअर्ट वाल्कर, एगिस्टिनो ओबरहोफर, ओली बस्सी, रोबिन फ्रिबर्ग, राजान गुरुङ, सूर्य गुरुङ, स्योन शाही लगायतको अभिनय रहेको छ ।

गोर्खाहरूका लागि पहिलोपटक भिक्टोरिया क्रस प्राप्त गर्ने कुलवीर थापाको वास्तविक कथामा आधारित रहेर यो चलचित्र निर्माण भएको हो । चलचित्रमा गोर्खालीको त्याग, करुणा र मित्रताको कथा देखाइएको छ ।

चलचित्रको पुरै छायाङ्कन बेलायतमा गरिएको हो ।