१० चैत्र २०७९, काठमाडौँ : ‘कोशी’ खारेजी’ आन्दोलनको क्रममा घाइते भएका पहिचानवादी नेता पदम लिम्बु (लाजेहाङ) को निधन भएको छ। उनको उपचारको क्रममा शुक्रबार बिहान धरानस्थित बिपी कोइराला स्वास्थ विज्ञान प्रतिष्ठानमा निधन भएको हो। चैत ५ गते विराटनगरमा भएको कोशी प्रदेश नामाकरणको विरोध प्रदर्शनको क्रममा पदम प्रहरीको कुटाइबाट घाइते भएको प्रदेश नम्बर १ पुनः नामांकन संयुक्त संघर्ष समितिले जनाएको छ।

---

उनलाई थप उपचारका लागि काठमाडौँ लैजाने तयारी गरिरहँदा निधन भएको समितिले जनाएको छ। समितिले विज्ञप्ति जारी गर्दै पदम लिम्बूलाई सहिद घोषणा गर्न माग गरेको छ।

---

‘लाजेहाङको हत्याको जिम्मा प्रदेश १ लाई षडयन्त्रमूलक ढंगले कोशी नाम राख्ने ८२ जना सांसदहरू, पार्टीहरू, मुख्यमन्त्री हिक्मत कार्की र वर्तमान प्रधानमन्त्री एवं नेपाल प्रहरीले लिनु पर्दछ’, विज्ञप्तिमा भनिएको छ।

---

समितिले लिम्बु हत्याको अनुसन्धान गर्न छानबिन आयोग गठन गर्नसमेत माग गरेको छ । ४२ वर्षीय लिम्बु २०५२ सालदेखि लिम्बुवान आन्दोलनमा सक्रिय थिए। उनको शव बिपी प्रतिष्ठानको शव गृहमा राखिएको छ।