३ कात्तिक २०७९, काठमाडौँ : धितोपत्र बजारमा शेयर कारोबार मापक नेप्से परिसूचक आज झिनो अङ्कले ओरालो लागेको छ। नेपाल स्टक एक्सचेञ्जका अनुसार नेप्से परिसूचक १.३८ अङ्कले ओरालो लागेर १८४४.१४ मा सीमित भएको छ। यस्तै, ठूला कम्पनीको कारोबार मापन गर्ने सेन्सेटिभ परिसूचक ०.०९अङ्कले उकालो लागेर ३६३.०५ मा पुगेको छ।

कूल २२१ वटा कम्पनीको १५ लाख ४६ हजार ८ सय ५७ कित्ता सेयर खरिदबिक्री हुँदा ५० करोड ७६ लाख ८९ हजार ५ सय ६१ रूपैयाँ बराबरको कारोबार भएको नेप्सेले जनाएको छ । स्टकका अनुसार कारोबार भएका कूल १३ उपसमूहमध्ये आज ३ वटा उपसमूहको सेयर बढेको छ भने बाँकी १० वटा उपसमूहको सेयर घटेको छ ।

बिहीबार अभियान लघुवित्त वित्तीय संस्था लिमिटेडको सर्वाधिक कारोबार भएको छ । लघुवित्तको ३ करोड ६९ लाख ५२ हजार रूपैयाँ बराबरको कारोबार भएको हो । आज सयपत्री हाइड्रोपावर कम्पनी लिमिटेडको सेयरमूल्यमा सकारात्मक सर्किट लागेको छ । कम्पनीको सेयरमूल्य ९.९७ प्रतिशतले बढेर २ सय ५९ रूपैयाँ १० पैसा पुगेको छ ।

यता लगातार सकारात्मक सर्किट लाग्दै आएको अभियान लघुवित्त वित्तीय संस्था लिमिटेडको ओरालो यात्रा सुरू भएको छ । आज कम्पनी सर्वाधिक मूल्य घट्ने कम्पनीहरूमध्येको तेश्रो नम्बरमा परेको छ ।