मन्त्री बडूद्वारा भारतीय र बंगलादेशका समकक्षी मन्त्रीसँग छुट्टाछुट्टै भेटवार्ता

प्रकाशित मिति

२०७९ जेष्ठ ३१ गते, मंगलवार १२:२५

received 1197046124429890 e1655188803730

३१ जेठ २०७९ काठमाडौंः स्विजरल्याण्डको जेनेभामा जारी विश्‍व व्यापार संगठनको १२ औं मन्त्रिस्तरीय सम्मेलनमा सहभागी माननीय उद्योग,वाणिज्य तथा आपूर्ति मन्त्री दिलेन्द्रप्रसाद बडूले समकक्षी भारतीय वाणिज्य तथा उद्योग मन्त्री पीयूष गोयल र बंगलादेशका वाणिज्य मन्त्री टिपु मुन्सीसँग छुट्टाछुट्टै भेटवार्ता गरेका छन् ।


उनीहरूसँग आज भएको भेटमा बहुपक्षीय व्यापार, त्यसमा हाल सामना गर्नु परेका चुनौती, द्विपक्षीय तथा बहुपक्षीय व्यापार सहजीकरण, वैदेशिक लगानी, औद्योगिक पूर्वाधार निर्माणलगायत विविध पक्षमा छलफल भएको प्रतिनिधिमण्डलमा सहभागी उद्योग,वाणिज्य तथा आपूर्ति मन्त्रालयका प्रवक्ता एवं सहसचिव डा. नारायण प्रसाद रेग्मीले जानकारी दिए ।


मन्त्री बडूले कोरोना महामारीबाट भएको क्षति, सम्भावित खाद्य संकटको समाधान, कम विकसित मुलुकहरुको स्वास्थ्य प्रणालीको सुधार, प्रतिस्पर्धामा आधारित निर्यात प्रणालीमा विकसित मुलुकहरूबाट लिन सकिने लाभका विषयमा आवश्यक सहकार्य गरी अगाडि बढ्नुपर्ने बताएका थिए । नेपालमा लगानीमैत्री वातावरण बनाउन र लगानीको सुरक्षाका विषयमा सरकार प्रतिवद्ध रहेको बारे जानकारी गराउँदै मन्त्री बडूले वस्तु तथा सेवाको विस्तार र लगानीका नयाँ सम्भावनाका क्षेत्रमा लगानी गरी पारस्परिक लाभ उठाउन सकिने धारणा राखेका थिए ।


यसअघि सम्मेलनको उद्घाटन सत्रलाई सम्बोधन गर्दै मन्त्री बडूले डब्लूटीओका सबै सदस्य राष्ट्रहरूसँग नियममा आधारित, निष्पक्ष, पारदर्शी सिद्धान्त र सम्भावित बहुपक्षीय व्यापार प्रणाली अवलम्बन गर्दै समृद्धि हासिल गर्न डब्लूटीओलाई थप प्रभावकारी बनाउनुपर्ने बताएका थिए । उनले ई(कमर्शको प्रयोग र क्षमता वृद्धि, डिजिटल डिभाइडलाई कम गर्न पहल गर्ने र उत्पादन क्षमता अभिवृद्धि गर्ने कुरामा पनि जोड दिएका थिए ।

received 3185789915072820

प्रतिकृया