• १२:५२ २०८० चैत्र १६ गते
  • 12:52 pm

उपभोक्ताका घरघरमा खानेपानीको धारा

प्रकाशित मिति

२०७७ मंसिर १२ गते, शुक्रबार ०६:३४

khanepani water nh 721x445 1 e1620732876887

काठमाडौं, दिक्तेल रुपाकोट मझुवागढी नगरपालिका–१४ बुईपास्थित राम्चेका ५२ घर स्थानीय बासिन्दाको घरमा जडान गरिएको खानेपानीको धारा सञ्चालनमा ल्याइएको छ । क्रिश्चियन एडको रु २५ लाख र नगरपालिकाको रु आठ लाख लगानीमा राम्चेका प्रत्येक घरमा खानेपानीको धारा जडान गरिएको हो ।

करिब डेढ किलोमिटर टाढा पर्ने पात्लेखोला मुहानबाट ल्याइएको खानेपानी आयोजनामा उपभोक्ताको १५ प्रतिशत श्रमदान रहेको निर्माण उपभोक्ता समितिका अध्यक्ष दुर्गाप्रसाद भट्टराईले बताए । “मुहानबाट एक हजार ६०० मिटर वर ४६ हजार लिटरको रिर्जभ ट्याङ्की निर्माण गरिएको छ”, उनले भने, “रिजर्भ ट्याङ्कीबाट राम्चेका ५२ घर स्थानीय उपभोक्ताको प्रत्येक घरमा एक÷एक वटा खानेपानीको धारा जडान गरेर सञ्चालनमा ल्याइएको छ ।”

बालसेवा समाज नेपाल नेर्पाको प्राविधिक सहयोगमा सञ्चालन गरिएको खानेपानी आयोजनामार्फत घरघरमा धारा जडान भएपछि उपभोक्ता हर्षित भएका छन् । वर्षौंदेखि खानेपानीको समस्या झेल्दै आएका राम्चेका स्थानीय उपभोक्ता नगरपालिका र क्रिश्चियन एडको आर्थिक सहयोगमा सञ्चालित खानेपानी आयोजनामार्फत आआफ्नो घरमा खानेपानीको धारा वितरण भएपछि हर्षित भएका हुन् ।

निर्माण उपभोक्ता समितिमार्फत सञ्चालन गरिएको खानेपानी आयोजना आज प्रतिनिधिसभा सदस्य एवं सत्तारुढ दल नेपाल कम्युनिष्ट पार्टी ९नेकपा०का केन्द्रीय सदस्य विशाल भट्टराईले औपचारिक उद्घाटन गरे । करिब छ महिनामा निर्माण सम्पन्न गरिएको खानेपानी आयोजना उद्घाटन कार्यक्रमलाई सम्बोधन गर्नुहुँदै सांसद भट्टराईले प्रत्येक नागरिकको घरमा धारा जडान गर्ने सरकारको नीति नै रहेकाले बाँकी रहेका व्यक्तिका घरमा पनि क्रमशः जडान गरिने बताए ।

खानेपानी आयोजना उद्घाटन कार्यक्रममा नगरप्रमुख दीपनारायण रिजाल, उपप्रमुख विणादेवी राई, जिल्लास्थित राजनीतिक दलका प्रमुख तथा प्रतिनिधि लगायतको उपस्थिति रहेको थियो ।

बुईपास्थित राम्चेमा आयोजना गरिएको उद्घाटन कार्यक्रममा स्थानीय कलाकारले साँगीतिक प्रस्तुतिसमेत प्रस्तुत गरेका थिए । क्रिश्चियन एडले राम्चेका ४६ घर उपभोक्तालाई पानी जम्मा गर्ने हिलट्याङ्कीसमेत वितरण गरेको छ । राम्चेका स्थानीय बासिन्दालाई तरकारीबालीमा अग्रसर गराउने उद्देश्यले प्रतिघर परिवारलाई ५०० मिटरको पाटी ट्याङ्की वितरण गरेको हो ।

यसैबीच क्रिश्चियन एड नेपालकै लगानीमा बुईपास्थित पञ्चदोबाटोमा निर्माण गरिएको कृषिउपज सङ्कलन केन्द्र पनि उद्घाटन गरिएको छ । बालसेवा समाज नेपालको सहजीकरण तथा क्रिश्चियन एडको रु १० लाख आर्थिक लगानीमा निर्माण गरिएको कृषिउपज सङ्कलन केन्द्र उद्घाटनको गरिएको हो ।

कृषिउपज सङ्कलन केन्द्र उद्घाटन कार्यक्रममा कृषकलाई इलेक्ट्रिक ह्याम्बर, हजारी, विषादी स्प्रे, राडीपाखी व्यवासयका लागि कोरासो र क्यारेटसमेत वितरण गरिएको परियोजनाका प्रबन्धक युवराज रिजालले बताए ।

सङ्कलन केन्द्र सञ्चालन भएपछि विचौलिया अन्य हुने तथा कृषकले उत्पादन गरेका कृषिउपज बाह्य बजारमा बिक्रीका लागि पठाउन सहज भएको छ । उक्त वडाका सबैभन्दा विपन्न परिवारमा पर्ने तुलासिं राईलाई रु ५० हजार बराबरको जस्तापातासमेत प्रदान गरिएको जनाइएको छ ।

बाख्रापालन व्यवसाय सञ्चालन गर्न खोर निर्माण गर्नेगरी तुलासिंलाई जस्तापाता प्रदान गरिएको वडाध्यक्ष दिनेश राईले जानकारी दिए ।
रासस

प्रतिकृया