वीरगञ्ज, कार्यवाहक प्रधानमन्त्री एवं रक्षामन्त्री इश्वर पोखरेलले जनतासमक्ष गरिएको प्रतिबद्धता अनुसारनै सरकारले काम गर्ने बताउनु भएको छ । बुधबार वीरगञ्जमा जनता आवास पुनःनिर्माण कार्यदलले आयोजना गरेको समापन तथा हस्तान्तरण कार्यक्रममा यस्तो बताउनु भएको हो ।

मुलुकमा नयाँ व्यवस्था कार्यान्वयनको चरणमा रहेका कारण जन अपेक्षा अनुसार काम हुन नसकेको बताउँदै भन्नुभयो, ‘प्रधानमन्त्रीले पहिलो वर्ष आधार वर्ष भन्नुभएको थियो, पहिलो वर्ष पूरा भएपछि देशबासीको नाममा सम्बोधन गर्दै डेलिभरीको वर्ष भन्नुभएको छ । यो वर्ष प्रधानमन्त्रीले गरेको प्रतिबद्धता अनुसार काममा केन्द्रित गर्नेछौं । नगरी नहुने काम, नभइ नहुने संरचना, नभइ नहुने विशेष ऐन तयार छ । अब हामी जनतालाई जे प्रतिबद्धता गरेका छौं, त्यही अनुसार काम गर्छौं । निर्वाचनको समयमा गरेको प्रतिबद्धता अनुरुप काम गर्छौं, ठिक ढंगले गरेको वा गर्न नसकेको भए जनताबाट हुने फैसलालाई हामी स्वीकार गर्छौं ।’

‘दुई तहको सरकार बन्यो, सरकार गठन भएको यहाँसम्म आईपुग्दा थुप्रै कुराहरु हुनुपर्ने हो तर भएन । हिजो गर्छु भनेका थुप्रै कुराहरु किन भएन ? यो स्वभाविक प्रश्न आम जनताको बीचमा छ’ भन्दै उहाँले भन्नुभयो ‘सरकार परिवर्तन मात्रै होईन, यो त प्रणाालीमा भएको परिवर्तन हो । ०७२ साल असोजमा आएर संविधान घोषणा भयो । संविधान कार्यन्वयन गराउनका लागि आवश्यक कानुन, संरचना र विशेष ऐनहरु प्रयाप्त थिएनन् ।’